ಅಧ್ಯಾಯ 7

ಮಾರ್ಕನು ಬರೆದ ಸುಸಂದೇಶಗಳು

ಊಟದಿಂದ ಮನುಷ್ಯರು ಕೆಡುವುದಿಲ್ಲವೆಂದು ಯೇಸು ಬೋಧಿಸಿದ್ದು

(ಮತ್ತಾಯ 15:1-20)

¹ತರುವಾಯ ಜೆರುಸಲೇಮಿನಿಂದ ಬಂದಿದ್ದ ಫರಿಸಾಯರೂ, ಧರ್ಮಶಾಸ್ತ್ರಿಗಳಲ್ಲಿ ಕೆಲವರೂ ಯೇಸುವಿನ ಬಳಿಗೆ ಬಂದರು. ²ಯೇಸುವಿನ ಶಿಷ್ಯರಲ್ಲಿ ಕೆಲವರು ಅಶುದ್ಧವಾದ ಅಂದರೆ ತೊಳೆಯದಿರುವ ಕೈಗಳಿಂದ ರೊಟ್ಟಿ ತಿನ್ನುವುದನ್ನು ಅವರು ನೋಡಿದ್ದರು. ³ಫರಿಸಾಯರು ಮತ್ತು ಯೆಹೂದ್ಯರು ಹಿರಿಯರ ಸಂಪ್ರದಾಯವನ್ನು ಅನುಸರಿಸುತ್ತಾ ತಮ್ಮ ಕೈಗಳನ್ನು ಅನೇಕ ಸಾರಿ ತೊಳೆದುಕೊಳ್ಳುತ್ತಿದ್ದರು. ಕೈ ತೊಳೆದುಕೊಳ್ಳದ ಹೊರತು ಅವರು ಊಟಮಾಡುವುದಿಲ್ಲ. ⁴ಅವರು ಪೇಟೆಯಿಂದ ಬಂದಾಗ ಸ್ನಾನ ಮಾಡದೆ ಊಟಮಾಡುತ್ತಿರಲಿಲ್ಲ; ಅವರು ಬಟ್ಟಲುಗಳನ್ನು, ಪಾತ್ರೆಗಳನ್ನು, ಹಿತ್ತಾಳೆಯ ಪಾತ್ರೆಗಳನ್ನು, ಮೇಜುಗಳನ್ನು ತೊಳೆಯುವಂಥ ಅನೇಕ ಆಚಾರಗಳನ್ನು ಅನುಸರಿಸುತ್ತಿದ್ದರು. 

⁵ಫರಿಸಾಯರೂ ಶಾಸ್ತ್ರಿಗಳೂ ಯೇಸುವಿನ ಬಳಿ ಬಂದು ಅವರಿಗೆ,

"ನಿನ್ನ ಶಿಷ್ಯರು ಹಿರಿಯರ ಸಂಪ್ರದಾಯದ ಪ್ರಕಾರ ಕೈತೊಳೆದುಕೊಳ್ಳದೆ ರೊಟ್ಟಿಯನ್ನು ಹೇಗೆ ತಿನ್ನುತ್ತಾರೆ?"

ಎಂದು ಕೇಳಿದರು. ⁶ಯೇಸುವು ಪ್ರತ್ಯುತ್ತರವಾಗಿ ಅವರಿಗೆ, 

“ಕಪಟಿಗಳಾದ ನಿಮ್ಮ ವಿಷಯದಲ್ಲಿ ಯೆಶಾಯನು ಯೋಗ್ಯವಾಗಿಯೇ ಪ್ರವಾದಿಸಿದ್ದಾನೆ. 

'ಈ ಜನರು ಸನ್ಮಾನಿಸುವರೆನ್ನನು ಬರಿ ಮಾತಿನಿಂದಅವರ ಮನಸ್ಸು ದೂರವಾಗಿಹುದೆನ್ನಿಂದ ⁷ಮನುಕಟ್ಟಳೆಗಳ ಬೋಧಿಸಿ ಕಲಿಸುವರವರು ವ್ಯರ್ಥವು ಅವರೆನ್ನನು ಆರಾಧಿಸುವುದು' ಎಂದು ಬರೆಯಲ್ಪಟ್ಟ ಪ್ರಕಾರ ⁸ನೀವು ದೇವರ ಆಜ್ಞೆಯನ್ನು ಬದಿಗೆ ತಳ್ಳುವುದಕ್ಕಾಗಿ ಪಾತ್ರೆಗಳನ್ನು ಮತ್ತು ಬಟ್ಟಲುಗಳನ್ನು ತೊಳೆಯಬೇಕೆನ್ನುವ ಮಾನವ ಸೃಷ್ಟಿಸಿದ ಅನೇಕ ಸಂಪ್ರದಾಯಗಳನ್ನು ಹಿಡಿದು ಅನುಸರಿಸುತ್ತೀರಿ,"

ಎಂದರಲ್ಲದೇ,

⁹"ನೀವು ನಿಮ್ಮ ಸಂಪ್ರದಾಯವನ್ನು ಕೈಗೊಳ್ಳುವ ಸಲುವಾಗಿ ದೇವರ ಆಜ್ಞೆಯನ್ನು ಸಂಪೂರ್ಣವಾಗಿ ಅಸಡ್ಡೆ ಮಾಡುತ್ತೀರಿ. ಬಹು ಚೆನ್ನಾಗಿದೆ; ¹⁰ಮೋಶೆಯು, 'ನಿನ್ನ ತಂದೆ-ತಾಯಿಯನ್ನು ಗೌರವಿಸಬೇಕೆಂದೂ ಮತ್ತು ನಿನ್ನ ತಂದೆಯನ್ನಾಗಲಿ, ತಾಯಿಯನ್ನಾಗಲಿ ದೂಷಿಸುವವನಿಗೆ ಮರಣದಂಡನೆ ಆಗಬೇಕೆಂದೂ ಹೇಳಿದ್ದಾನೆ. ¹¹ಆದರೆ 'ಒಬ್ಬ ಮನುಷ್ಯನು ತನ್ನ ತಂದೆಯ ಅಥವಾ ತಾಯಿಯ ಸಂರಕ್ಷಣೆಗಾಗಿ ಕೊಡಬೇಕಾಗಿರುವುದನ್ನು ದೇವರಿಗಾಗಿ ಇಟ್ಟಿದ್ದೇನೆ' ಎಂದು ಹೇಳಿದರೆ ನೀವು, 'ಅವನು ತನ್ನ ತಂದೆಗಾಗಲಿ, ತಾಯಿಗಾಗಲಿ ಇನ್ನೇನೂ ಮಾಡಬಾರದು' ಎಂದು ಹೇಳುತ್ತೀರಿ. ¹²ಅವನು ತನ್ನ ತಂದೆಗೂ, ತಾಯಿಗೂ ಏನನ್ನೂ ನೀವು ಮಾಡಗೊಡಿಸದಂತೆ ¹³ನೀವು ಕಲಿಸಿರುವ ನಿಮ್ಮ ಸಂಪ್ರದಾಯದ ಮೂಲಕ ದೇವರವಾಕ್ಯವನ್ನು ನಿರರ್ಥಕಮಾಡುತ್ತೀರಿ, ಮತ್ತು ಇಂತಹ ಇನ್ನೂ ಎಷ್ಟೋ ಮಾಡುತ್ತೀರಿ,"

ಎಂದರು. ¹⁴ಆಮೇಲೆ ಅವರು ಜನರನ್ನೆಲ್ಲಾ ತಮ್ಮ ಬಳಿಗೆ ಕರೆದು ಅವರಿಗೆ,

"ನಿಮ್ಮಲ್ಲಿ ಪ್ರತಿಯೊಬ್ಬನೂ ನಾನು ಹೇಳುವುದನ್ನು ಕೇಳಿ ತಿಳಿದುಕೊಳ್ಳಿರಿ; ¹⁵ಹೊರಗಿನಿಂದ ಮನುಷ್ಯನೊಳಕ್ಕೆ ಸೇರಿ ಅವನನ್ನು ಹೊಲಸುಮಾಡುವಂತಹದ್ದು ಯಾವುದೂ ಇಲ್ಲ. ಆದರೆ ಅವನ ಒಳಗಿನಿಂದ ಹೊರಗೆ ಬರುವಂತಹವುಗಳೇ ಮನುಷ್ಯನನ್ನು ಹೊಲಸು ಮಾಡುವುದು. ¹⁶ಯಾರಿಗಾದರೂ ಕೇಳುವುದಕ್ಕೆ ಕಿವಿಗಳಿದ್ದರೆ ಅವನು ಕೇಳಲಿ,"

ಎಂದರು. 

¹⁷ಯೇಸುವು ಜನರನ್ನು ಬಿಟ್ಟು ಮನೆಯೊಳಕ್ಕೆ ಬಂದ ಮೇಲೆ ಅವರ ಶಿಷ್ಯರು ಆ ಸಾಮತಿಯ ವಿಷಯವಾಗಿ ಅವರನ್ನು ಕೇಳಿದರು. ¹⁸ಆಗ ಅವರು,

"ನೀವೂ ಸಹ ತಿಳಿದುಕೊಳ್ಳಲು ಅಶಕ್ತರಾಗಿದ್ದೀರಾ? ಹೊರಗಿನಿಂದ ಮನುಷ್ಯನೊಳಕ್ಕೆ ಸೇರುವಂಥದ್ದು ಯಾವುದೂ ಅವನನ್ನು ಹೊಲಸು ಮಾಡಲಾರದು ¹⁹ಏಕೆಂದರೆ ಅದು ಅವನ ಹೃದಯದೊಳಗೆ ಸೇರದೆ ಹೊಟ್ಟೆಯೊಳಗೆ ಹೋಗಿ ಬಹಿರ್ದೆಶೆಗೆ ಹೋಗುವುದರಿಂದ ಅವನನ್ನು ಹೊಲಸು ಮಾಡಲಾರದು. ²⁰ಮತ್ತು ಮನುಷ್ಯನೊಳಗಿನಿಂದ ಹೊರಡುವಂಥದ್ದೇ ಮನುಷ್ಯನನ್ನು ಹೊಲಸು ಮಾಡುತ್ತದೆ. ²¹ಏಕೆಂದರೆ ಮನುಷ್ಯರ ಹೃದಯದೊಳಗಿಂದ ಹೊರಡುವಂಥದ್ದು ಅವರ ಕೆಟ್ಟಆಲೋಚನೆಗಳು, ವ್ಯಭಿಚಾರಗಳು, ಹಾದರಗಳು, ಕೊಲೆಗಳು, ²²ಕಳ್ಳತನಗಳು, ದುರಾಸೆ, ಕೆಟ್ಟತನ, ಮೋಸ, ಕಾಮಾಭಿಲಾಷೆ, ಕೆಟ್ಟದೃಷ್ಟಿ, ದೇವದೂಷಣೆ, ಗರ್ವ, ಬುದ್ಧಿಗೇಡಿತನ, ²³ಈ ಎಲ್ಲಾ ಕೆಟ್ಟವುಗಳು ಮನುಷ್ಯನೊಳಗಿನಿಂದ ಬಂದು ಅವನನ್ನು ಹೊಲಸು ಮಾಡುತ್ತವೆ,"

ಎಂದರು. 

ಯೇಸು ಅನ್ಯಮತಸ್ಥಳ ಮಗಳನ್ನೂ, ಒಬ್ಬ ಮೂಗನನ್ನೂ ಗುಣಪಡಿಸಿದ್ದು

(ಮತ್ತಾಯ 15:21-28)

²⁴ಅಲ್ಲಿಂದ ಯೇಸುವು ಎದ್ದು ಹೊರಟು ತೂರ್‌ ಸೀದೋನ್‌ ಪ್ರಾಂತ್ಯಗಳಿಗೆ ಹೋಗಿ ಅಲ್ಲಿಯ ಒಂದು ಮನೆಯಲ್ಲಿ ಯಾರಿಗೂ ತಿಳಿಯದಂತೆ ತಂಗಲು ಪ್ರಯತ್ನಿಸಿದರು. ಆದರೆ ಹಾಗೆ ಮರೆಯಾಗಿರಲು ಅವರಿಗೆ ಸಾಧ್ಯವಾಗದೇ ಹೋಯಿತು. ²⁵ಕೂಡಲೇ ಒಬ್ಬ ಹೆಂಗಸು ಯೇಸುವಿನ ವಿಷಯ ಕೇಳಿ ಅಲ್ಲಿಗೆ ಬಂದು ಅವರ ಪಾದಗಳಿಗೆ ಬಿದ್ದಳು. ಆಕೆಯ ಮಗಳಿಗೆ ದೆವ್ವ ಹಿಡಿದಿತ್ತು. ²⁶ಆ ಸ್ತ್ರೀಯು ಅನ್ಯಮತದವಳೂ, ಸುರೋಪೊಯಿನಿಕ ಜನಾಂಗದವಳೂ ಆದ ಒಬ್ಬ ಗ್ರೀಕಳು. ಆಕೆಯು ತನ್ನ ಮಗಳಿಗೆ ಹಿಡಿದ ದೆವ್ವವನ್ನು ಬಿಡಿಸಬೇಕೆಂದು ಯೇಸುವನ್ನು ಬೇಡಿಕೊಂಡಳು. ²⁷ಆದರೆ ಯೇಸು ಆಕೆಗೆ,

"ಮಕ್ಕಳಿಗೆ ಮೊದಲು ತೃಪ್ತಿಯಾಗಲಿ; ಏಕೆಂದರೆ ಮಕ್ಕಳ ರೊಟ್ಟಿಯನ್ನು ತೆಗೆದುಕೊಂಡು ನಾಯಿಗಳಿಗೆ ಹಾಕುವುದು ಸರಿಯಲ್ಲ,"

ಎಂದು ಹೇಳಿದರು. ²⁸ಆಕೆಯು ಪ್ರತ್ಯುತ್ತರವಾಗಿ,

"ಹೌದು, ಸ್ವಾಮಿ; ಆದರೂ ಮೇಜಿನ ಕೆಳಗೆ ಬಿದ್ದ ಮಕ್ಕಳ ರೊಟ್ಟಿಯ ತುಂಡುಗಳನ್ನು ನಾಯಿಗಳು ತಿನ್ನಬಹುದಲ್ಲವೇ?"

ಎಂದಳು. ²⁹ಯೇಸುವು ಅವಳಿಗೆ,

"ಈ ಮಾತನ್ನು ಹೇಳಿದ್ದರಿಂದ ದೆವ್ವವು ನಿನ್ನ ಮಗಳನ್ನು ಬಿಟ್ಟು ಹೋಗಿದೆ, ನೀನು ಹೋಗು,"

ಎಂದರು. ³⁰ಆಕೆ ತನ್ನ ಮನೆಗೆ ಬಂದಾಗ ತನ್ನ ಮಗಲಿಗೆ ಹಿಡಿದಿದ್ದ ದೆವ್ವವು ಅವಳನ್ನು ಬಿಟ್ಟು ಹೊರಟು ಹೋದದ್ದನ್ನೂ, ಮಗಳು ಹಾಸಿಗೆಯ ಮೇಲೆ ಮಲಗಿರುವುದನ್ನೂ ಕಂಡಳು. 

³¹ತಿರುಗಿ ಯೇಸುವು ತೂರ್‌ ಸೀದೋನ್‌ ತೀರಗಳಿಂದ ಹೊರಟು ದೆಕಪೊಲಿಯ ತೀರಗಳ ಮಧ್ಯದಿಂದ ಗಲಿಲೇಯ ಸಮುದ್ರದ ಬಳಿಗೆ ಬಂದರು. ³²ಆಗ ಕೆಲವರು ತೊದಲು ಮಾತನಾಡುವ ಒಬ್ಬ ಕಿವುಡನನ್ನು ಯೇಸುವಿನ ಬಳಿಗೆ ತಂದು ಅವರ ಕೈಯನ್ನು ಕಿವುಡನ ಮೇಲೆ ಇಡಬೇಕೆಂದು ಬೇಡಿಕೊಂಡರು. ³³ಅವರು ಕಿವುಡನನ್ನು ಜನಸಮೂಹದಿಂದ ಆಚೆಗೆ ಕರೆದುಕೊಂಡು ಹೋಗಿ ತಮ್ಮ ಬೆರಳುಗಳನ್ನು ಅವನ ಕಿವಿಗಳಲ್ಲಿಟ್ಟು ಉಗುಳಿ ³⁴ಅವನ ನಾಲಿಗೆಯನ್ನು ಮುಟ್ಟಿ ಆಕಾಶದ ಕಡೆಗೆ ನೋಡಿ ನಿಟ್ಟುಸಿರು ಬಿಟ್ಟು ಅವನಿಗೆ, "ಎಪ್ಫಥಾ" ಅಂದರೆ "ತೆರೆಯಲ್ಪಡಲಿ" ಎಂದು ಹೇಳಿದರು. ³⁵ಕೂಡಲೆ ಅವನ ಕಿವಿಗಳು ತೆರೆಯಲ್ಪಟ್ಟವು; ಅವನ ನಾಲಿಗೆಯ ನರವು ಸಡಿಲವಾಯಿತು; ಮತ್ತು ಅವನು ಸ್ಪಷ್ಟವಾಗಿ ಮಾತನಾಡತೊಡಗಿದನು. ³⁶ಯಾರಿಗೂ ಇದನ್ನು ಹೇಳಬಾರದೆಂದು ಯೇಸುವು ಅವನಿಗೆ ಹೇಳಿದರು; ಆದರೆ ರಹಸ್ಯವಾಗಿರಲಿ ಎಂದು ಎಷ್ಟು ಹೇಳಿದರೂ ಅವರು ಅದನ್ನು ಮತ್ತಷ್ಟು ಹೆಚ್ಚಾಗಿ ಪ್ರಚಾರ ಮಾಡಿದರು. ³⁷ಜನರು ಅತ್ಯಾಶ್ಚರ್ಯಪಟ್ಟು,

"ಆತನು ಎಲ್ಲವುಗಳನ್ನು ಚೆನ್ನಾಗಿ ಮಾಡಿದ್ದಾನೆ; ಕಿವುಡರು ಕೇಳುವಂತೆಯೂ, ಮೂಕರು ಮಾತನಾಡುವಂತೆಯೂ ಮಾಡಿದ್ದಾನೆ,"

ಎಂದು ಮಾತನಾಡಿಕೊಂಡರು. 

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ