ಅಧ್ಯಾಯ 5

ಮಾರ್ಕನು ಬರೆದ ಸುಸಂದೇಶಗಳು

ದೆವ್ವಗಳ ದಂಡಿನಿಂದ ದೊರಕಿದ ಮುಕ್ತಿ

(ಮತ್ತಾಯ 8:28-34; ಲೂಕ 8:26-39)

¹ಆ ಮೇಲೆ ಅವರು ಸಮುದ್ರದ ಆಚೆಯ ದಡದಲ್ಲಿದ್ದ ಗೆರಸೇನರ ಸೀಮೆಯನ್ನು ತಲಪಿದರು. ²ಯೇಸುವು ದೋಣಿಯಿಂದ ಕೆಳಗಿಳಿದ ಕೂಡಲೆ ದೆವ್ವಹಿಡಿದಿದ್ದ ಮನುಷ್ಯನೊಬ್ಬನು ಸಮಾಧಿಗಳ ಗವಿಗಳಿಂದ ಬಂದು ಅವರನ್ನು ಎದುರುಗೊಂಡನು. ^3-4ಆ ಮನುಷ್ಯನು ಸಮಾಧಿಗಳ ನಡುವೆ ವಾಸಿಸುತ್ತಿದ್ದನು; ಅನೇಕ ಸಲ ಅವನನ್ನು ಬೇಡಿಗಳಿಂದಲೂ, ಸರಪಣಿಗಳಿಂದಲೂ ಕಟ್ಟಿದ್ದರೂ ಅವನು ಸರಪಣಿಗಳನ್ನು ಕಿತ್ತು, ಬೇಡಿಗಳನ್ನು ಮುರಿದು ಹಾಕಿದ್ದನು; ಅವನನ್ನು ಸರಪಣಿಗಳಿಂದ ಕಟ್ಟಿಲು, ಹತೋಟಿಗೆ ತರಲು ಯಾರಿಗೂ ಸಾಧ್ಯವಾಗಲಿಲ್ಲ. ⁵ಅವನು ನಿತ್ಯ ರಾತ್ರಿ ಹಗಲೂ ಸಮಾಧಿಯ ಗವಿಗಳಲ್ಲಿಯೂ, ಗುಡ್ಡಗಳಲ್ಲಿಯೂ ಆರ್ಭಟಿಸುತ್ತಾ, ಕಲ್ಲುಗಳಿಂದ ತನ್ನನ್ನು ಸೀಳಿಕೊಳ್ಳುತ್ತಾ ಇದ್ದನು. ⁶ಅವನು ಯೇಸುವನ್ನು ದೂರದಿಂದ ನೋಡಿದ ಕೂಡಲೆ ಓಡಿಬಂದು ಪ್ರಣಾಮಮಾಡಿ, ಮಹಾಶಬ್ದದಿಂದ ಆರ್ಭಟಿಸಿ,

⁷“ಯೇಸುವೇ, ಪರಾತ್ಪರನಾದ ದೇವಪುತ್ರನೇ, ನನ್ನ ಗೊಡವೆ ನಿನಗೇಕೆ? ದೇವರಾಣೆ, ನೀನು ನನ್ನ ಕಾಡಬೇಡ,”

ಎಂದು ಹೇಳಿದನು. ⁸ಏಕೆಂದರೆ ಯೇಸುವು,

“ದೆವ್ವವೇ, ಆ ಮನುಷ್ಯನನ್ನು ಬಿಟ್ಟುಹೋಗು,”

ಎಂದು ಹೇಳಿದ್ದರು.

⁹ಯೇಸುವು ಆ ಮನುಷ್ಯನಿಗೆ,

“ನಿನ್ನ ಹೆಸರೇನು?”

ಎಂದು ಕೇಳಲು, ಅವನು,

“ನನ್ನ ಹೆಸರು ದಂಡು; ಏಕೆಂದರೆ ನಾವು ಬಹಳ ಮಂದಿ ಇದ್ದೇವೆ,”

ಎಂದು ಉತ್ತರಿಸಿ,

¹⁰"ಈ ಸೀಮೆಯಿಂದ ನಮ್ಮನ್ನು ಹೊರಡಿಸಬೇಡ,"

ಎಂದು ಯೇಸುವನ್ನು ಬಹಳವಾಗಿ ಬೇಡಿಕೊಂಡನು.

¹¹ಅಲ್ಲಿದ್ದ ಗುಡ್ಡದ ಮೇಲೆ ಹಂದಿಗಳ ದೊಡ್ಡ ಹಿಂಡು ಮೇಯುತ್ತಿತ್ತು. ¹²ಆ ದೆವ್ವಗಳು,

“ಆ ಹಂದಿಗಳೊಳಗೆ ಸೇರಿಕೊಳ್ಳುವುದಕ್ಕೆ ನಮ್ಮನ್ನು ಕಳುಹಿಸಿಕೊಡು,”

ಎಂದು ಬೇಡಿಕೊಂಡವು. ¹³ಯೇಸುವು 'ಆಗಲಿ' ಎನ್ನುತ್ತಾ ಅವುಗಳಿಗೆ ಅನುಮತಿಕೊಡಲು, ಆ ದೆವ್ವಗಳು ಹೊರಬಂದು ಹಂದಿಗಳೊಳಗೆ ಸೇರಿಕೊಂಡವು; ಆ ಹಂದಿಗಳು ಓಡಿ ಬೆಟ್ಟದ ಕಡಿದಾದ ಸ್ಥಳದಿಂದ ಸಮುದ್ರಕ್ಕೆ ಧುಮುಕಿ ಒಂದರ ಹಿಂದೊಂದು ಮುಳುಗಿ ಸತ್ತವು; ಆ ಹಿಂಡಿನಲ್ಲಿ ಸುಮಾರು ಎರಡು ಸಾವಿರ ಹಂದಿಗಳಿದ್ದವು. ¹⁴ಅವುಗಳನ್ನು ಮೇಯಿಸುತ್ತಿದ್ದವರು ಓಡಿಹೋಗಿ ನಡೆದ ಸಂಗತಿಯನ್ನು ಪಟ್ಟಣ ಮತ್ತು ಗ್ರಾಮಪ್ರದೇಶಗಳಲ್ಲಿರುವವರಿಗೆ ತಿಳಿಸಿದರು. ನಡೆದದ್ದೇನೆಂದು ನೋಡಲು ಜನರು ಅಲ್ಲಿಗೆ ಧಾವಿಸಿ ಬಂದರು. ¹⁵ಅವರು ಯೇಸುವಿನ ಬಳಿಗೆ ಬಂದು, ದೆವ್ವಗಳ ದಂಡಿನಿಂದ ಪೀಡಿತನಾಗಿದ್ದ ಆ ಮನುಷ್ಯನು ಬಟ್ಟೆಯನ್ನು ಧರಿಸಿಕೊಂಡು ಸ್ವಸ್ಥಚಿತ್ತನಾಗಿ ಕುಳಿತುಕೊಂಡಿರುವುದನ್ನು ನೋಡಿ ಭಯಭೀತರಾದರು. ¹⁶ಮಾತ್ರವಲ್ಲದೆ ನಡೆದ ಸಂಗತಿಯನ್ನು ನೋಡಿದ್ದವರು, ದೆವ್ವಹಿಡಿದಿದ್ದ ಮನುಷ್ಯನಿಗೂ ಮತ್ತು ಹಂದಿಗಳಿಗೂ ಏನು ಸಂಭವಿಸಿತೆಂಬುದನ್ನು ಅವರಿಗೆ ವಿವರಿಸಿದರು. ¹⁷ಅವರು ಯೇಸುವಿನ ಬಳಿ ನಡೆದು ತಮ್ಮ ಸೀಮೆಯನ್ನು ಬಿಟ್ಟುಹೋಗುವಂತೆ ಯೇಸುವನ್ನು ಬೇಡಿಕೊಂಡರು.

¹⁸ಯೇಸುವು ದೋಣಿಯನ್ನು ಹತ್ತುತ್ತಿದ್ದಾಗ ದೆವ್ವಹಿಡಿದಿದ್ದ ಆ ಮನುಷ್ಯನು,

"ನಾನೂ ನಿನ್ನ ಜೊತೆಯಲ್ಲಿ ಇರುತ್ತೇನೆ,"

ಎಂದು ಬೇಡಿಕೊಂಡನು. ¹⁹ಆದರೆ ಯೇಸುವು ಅದಕ್ಕೆ ಒಪ್ಪದೆ,

“ನೀನು ನಿನ್ನ ಮನೆಗೂ, ನಿನ್ನ ಜನರ ಬಳಿಗೂ ಹೋಗಿ, ಸ್ವಾಮಿಯು ನಿನ್ನಲ್ಲಿ ಕರುಣೆಯಿಟ್ಟು ನಿನಗೆ ಮಾಡಿದ ಉಪಕಾರವೆಲ್ಲವನ್ನೂ ಹೇಳು,”

 ಎಂದರು. ²⁰ಅವನು ಹೊರಟುಹೋಗಿ ಯೇಸು ತನಗೆ ಮಾಡಿದ ಉಪಕಾರವೆಲ್ಲವನ್ನೂ ದೆಕಪೊಲಿಯಲ್ಲಿ ಸಾರತೊಡಗಿದನು. ಜನರೆಲ್ಲರು ಇದನ್ನು ಕೇಳಿ ಆಶ್ಚರ್ಯಪಟ್ಟರು.

 ಸತ್ತ ಹುಡುಗಿಯನ್ನು ಬದುಕಿಸಿದ್ದು; ಸ್ತ್ರೀಯ ರಕ್ತಸ್ರಾವ ರೋಗವನ್ನು ಗುಣಪಡಿಸಿದ್ದು

(ಮತ್ತಾಯ 9:18-26; ಲೂಕ 8:40-56)

²¹ಪುನಃ ಯೇಸು ದೋಣಿಯಲ್ಲಿ ಆಚೆಯ ದಡಕ್ಕೆ ಹೋದಾಗ ಜನರ ದೊಡ್ಡ ಗುಂಪು ಯೇಸುವಿನ ಬಳಿಗೆ ಬಂದು ಸೇರಿತು. ಅವರು ಸಮುದ್ರದ ದಡದಲ್ಲಿದ್ದರು. ²²ಆಗ ಸಭಾಮಂದಿರದ ಸಭಾಪತಿಗಳಲ್ಲಿ ಒಬ್ಬನಾದ ಯಾಯಿರನೆಂಬವನು ಬಂದು ಯೇಸುವನ್ನು ಕಂಡು ಅವರ ಪಾದಗಳಿಗೆ ಅಡ್ಡಬಿದ್ದು,

²³“ನನ್ನ ಚಿಕ್ಕ ಮಗಳು ಸಾಯುವ ಸ್ಥಿತಿಯಲ್ಲಿದ್ದಾಳೆ. ಆಕೆಯನ್ನು ಗುಣಪಡಿಸಿ ಬದುಕಲು ಸಾಧ್ಯವಾಗುವಂತೆ ನೀವು ಬಂದು ಅವಳ ಮೇಲೆ ಕೈಯಿಡಬೇಕು,”

ಎಂದು ಬಹಳವಾಗಿ ಬೇಡಿಕೊಂಡನು. ²⁴ಆಗ ಯೇಸುವು ಯಾಯಿರನೊಂದಿಗೆ ಅವನ ಮನೆಗೆ ಹೋದರು. ಜನರ ದೊಡ್ಡ ಗುಂಪು ಅವರನ್ನು ತಳ್ಳುತ್ತಾ ಅವರ ಹಿಂದೆಯೇ ಹೋಯಿತು. 

²⁵ಆಗ ಹನ್ನೆರಡು ವರ್ಷಗಳಿಂದ ರಕ್ತಸ್ರಾವ ರೋಗದಿಂದ ನರಳುತ್ತಿದ್ದ ಒಬ್ಬ ಸ್ತ್ರೀ ಅಲ್ಲಿಗೆ ಬಂದಳು. ²⁶ಅವಳು ಅನೇಕ ವೈದ್ಯರಲ್ಲಿ ಬಹುವಾಗಿ ಕಷ್ಟವನ್ನು ಅನುಭವಿಸಿ ತನ್ನಲ್ಲಿದ್ದುದೆಲ್ಲವನ್ನು ಖರ್ಚುಮಾಡಿದರೂ ಪ್ರಯೋಜನವಾಗದೆ ಆ ರೋಗವು ಹೆಚ್ಚುತ್ತಾ ಬಂದಿತೇ ಹೊರತು ಮತ್ತೇನೂ ಪ್ರಯೋಜನವಾಗಿರಲಿಲ್ಲ. ^27-28ಯೇಸುವಿನ ಸಮಾಚಾರವನ್ನು ಕೇಳಿಸಿಕೊಂಡ ಆ ಹೆಂಗಸು, “ನಾನು ಯೇಸುವಿನ ಮೇಲಂಗಿಯನ್ನು ಮುಟ್ಟಿದರೆ ಸಾಕು, ವಾಸಿಯಾಗುವೆನು,” ಎಂದುಕೊಂಡು  ಜನರ ಗುಂಪಿನ ಹಿಂದಿನಿಂದ ಬಂದು, ²⁹ಅವರ ಉಡುಪನ್ನು ಮುಟ್ಟಿದಳು; ಕೂಡಲೆ ಅವಳ ರಕ್ತಸ್ರಾವವು ನಿಂತುಹೋಯಿತು. ತನ್ನನ್ನು ಕಾಡುತ್ತಿದ್ದ ರೋಗವು ಗುಣವಾಯಿತು ಎಂಬುದು ಆಕೆಗೆ ತಿಳಿಯಿತು. ³⁰ಆ ಕ್ಷಣವೇ ತಮ್ಮಿಂದ ಶಕ್ತಿಯು ಹೊರಟುಹೋದುದನ್ನು ಗ್ರಹಿಸಿ ಯೇಸು ಹಿಂತಿರುಗಿ ಗುಂಪನ್ನು ನೋಡಿ,

“ನನ್ನ ಮೇಲಂಗಿಯನ್ನು ಮುಟ್ಟಿದವರು ಯಾರು?”

ಎಂದು ಕೇಳಿದರು. ³¹ಆಗ ಶಿಷ್ಯರು ಅವರಿಗೆ,

“ಜನರ ಗುಂಪು ನಿಮ್ಮನ್ನು ನೂಕುತ್ತಿರುವುದು ನಿಮಗೆ ತಿಳಿದೇ ಇದೆ. ಹೀಗಿರುವಾಗ, ‘ನನ್ನನ್ನು ಮುಟ್ಟಿದವರು ಯಾರು?’ ಎಂದು ಕೇಳುತ್ತೀರಲ್ಲ”

ಎಂದು ಹೇಳಿದರು. ³²ಆದರೂ ಹೀಗೆ ಮಾಡಿದವಳನ್ನು ನೋಡಬೇಕೆಂದು ಯೇಸುವು ಸುತ್ತಲೂ ಹುಡುಕುತ್ತಿರಲು ³³ಆ ಸ್ತ್ರೀ ತನಗೆ ಸಂಭವಿಸಿದ್ದನ್ನು ಅರಿತು ಭಯದಿಂದ ನಡುಗುತ್ತಾ ಬಂದು ಯೇಸುವಿಗೆ ಅಡ್ಡಬಿದ್ದು ನಡೆದ ಸಂಗತಿಯನ್ನೆಲ್ಲ ಹೇಳಿದಳು. ³⁴ಅದಕ್ಕೆ ಯೇಸುವು ಅವಳಿಗೆ,

“ಮಗಳೇ, ನಿನ್ನ ನಂಬಿಕೆಯೇ ನಿನ್ನನ್ನು ವಾಸಿಮಾಡಿದೆ. ಸಮಾಧಾನದಿಂದ ಹೋಗು; ನಿನ್ನನ್ನು ಕಾಡುತ್ತಿದ್ದ ರೋಗದಿಂದ ವಿಮುಕ್ತಳಾಗಿ ಆರೋಗ್ಯದಿಂದಿರು”

ಎಂದು ಹೇಳಿದರು.

³⁵ಅವರು ಇನ್ನೂ ಮಾತನಾಡುತ್ತಿದ್ದಾಗಲೇ ಸಭಾಮಂದಿರದ ಸಭಾಪತಿಯ ಮನೆಯಿಂದ ಬಂದು,

“ನಿನ್ನ ಮಗಳು ತೀರಿಹೋದಳು! ಇನ್ನು ಗುರುವಿಗೇಕೆ ತೊಂದರೆ ಕೊಡುವೆ?”

ಎಂದು ಹೇಳಿದರು. ³⁶ಅವರ ಮಾತಿಗೆ ಲಕಷ್ಯಕೊಡದೆ ಯೇಸು ಸಭಾಮಂದಿರದ ಸಭಾಪತಿಗೆ,

“ಭಯಪಡಬೇಡ, ನಂಬಿಕೆ ಮಾತ್ರ ನಿನ್ನಲ್ಲಿರಲಿ”

ಎಂದು ಹೇಳಿದರು. ³⁷ಮತ್ತು ಯೇಸುವು ಪೇತ್ರ, ಯಕೋಬ ಮತ್ತು ಯಕೋಬನ ತಮ್ಮನಾದ ಯೊವಾನ್ನನನ್ನು ಹೊರತು ಬೇರೆ ಯಾರನ್ನೂ ತಮ್ಮೊಂದಿಗೆ ಬರಗೊಡದೆ, ³⁸ಸಭಾಮಂದಿರದ ಸಭಾಪತಿಯ ಮನೆಗೆ ಬಂದಾಗ ಗದ್ದಲವನ್ನೂ, ಬಹಳವಾಗಿ ಅಳುತ್ತಿರುವವರನ್ನೂ, ಗೋಳಾಡುತ್ತಿರುವವರನ್ನೂ ಕಂಡರು. ³⁹ಮನೆಯೊಳಕ್ಕೆ ಹೋದ ಯೇಸುವು ಅವರಿಗೆ,

“ನೀವು ಗದ್ದಲಮಾಡುವುದೂ, ಅಳುವುದೂ ಏತಕ್ಕೆ? ಹುಡುಗಿಯು ಸತ್ತಿಲ್ಲ, ನಿದ್ರೆಮಾಡುತ್ತಿದ್ದಾಳೆ,”

ಎಂದರು. ⁴⁰ಇದನ್ನು ಕೇಳಿ ಅವರು ಯೇಸುವನ್ನು ಹಾಸ್ಯಮಾಡತೊಡಗಿದರು. ಆದರೆ ಯೇಸುವು ಅವರೆಲ್ಲರನ್ನು ಹೊರಕ್ಕೆ ಕಳುಹಿಸಿ, ಹುಡುಗಿಯ ತಂದೆತಾಯಿಯನ್ನು ಮತ್ತು ತನ್ನೊಂದಿಗಿದ್ದವರನ್ನು ಜೊತೆಯಲ್ಲಿ ಕರೆದುಕೊಂಡು ಹುಡುಗಿಯ ಬಳಿಗೆ ಹೋದರು. ⁴¹ಅವರು ಹುಡುಗಿಯ ಕೈ ಹಿಡಿದು,

“ತಾಲಿಥ ಕೂಮಿ”

ಅಂದರೆ,

“ಕುಮಾರಿ, ಎದ್ದೇಳು”

ಎಂದರು. ⁴²ಕೂಡಲೆ ಆ ಹುಡುಗಿಯು ಎದ್ದು ನಡೆದಾಡತೊಡಗಿದಳು; ಅವಳು ಹನ್ನೆರಡು ವರ್ಷ ವಯಸ್ಸಿನವಳಾಗಿದ್ದಳು. ಇದನ್ನು ನೋಡಿ ಅಲ್ಲಿದ್ದವರು ಆನಂದಪರವಶರಾದರು. ⁴³ಆದರೆ ನಡೆದುದನ್ನು ಯಾರಿಗೂ ತಿಳಿಸಬಾರದೆಂದು ಯೇಸುವು ಅವರಿಗೆ ಮತ್ತೆ ಮತ್ತೆ ಆಜ್ಞಾಪಿಸಿದರು ಮತ್ತು ಆ ಹುಡುಗಿಗೆ ಏನನ್ನಾದರೂ ತಿನ್ನಲು ಕೊಡುವಂತೆ ಅಲ್ಲಿದ್ದವರಿಗೆ ಸೂಚಿಸಿದರು.    

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ