ಅಧ್ಯಾಯ 16

ಮಾರ್ಕನು ಬರೆದ ಸುಸಂದೇಶಗಳು

ಸಾವಿನ ಸೋಲು

(ಮತ್ತಾಯ 28:1-8; ಲೂಕ 24:1-12; ಯೊವಾನ್ನ 20:1-10)

¹ಸಬ್ಬತ್ತು ದಿನ ಕಳೆದ ಬಳಿಕ ಮಗ್ದಲದ ಮರಿಯಳೂ ಯಕೋಬನ ತಾಯಿ ಮರಿಯಳೂ ಹಾಗು ಸಲೋಮೆಯೂ ಯೇಸುವಿನ ಶರೀರಕ್ಕೆಲೇಪಿಸಲು ಸುಗಂಧದ್ರವ್ಯಗಳನ್ನು ಕೊಂಡುಕೊಂಡರು. ²ವಾರದ ಮೊದಲನೆಯ ದಿನ ನಸುಕಿನಲ್ಲಿ ಸೂರ್ಯನು ಉದಯಿಸುವ ಸಮಯದಲ್ಲಿ ಅವರು ಸಮಾಧಿಯ ಬಳಿಗೆ ಬಂದರು, ³ಅವರು,

“ಸಮಾಧಿಯ ಬಾಗಲನ್ನು ಮುಚ್ಚಿದ್ದ ಕಲ್ಲನ್ನು ನಮಗಾಗಿ ಉರುಳಿಸಿ ಕೊಡುವವರು ಯಾರು?”

ಎಂದು ಅವರು ತಮ್ಮತಮ್ಮಲ್ಲೇ ಮಾತನಾಡಿಕೊಂಡರು. ⁴ಸಮಾಧಿಯನ್ನು ಮುಚ್ಚಿದ್ದ ಕಲ್ಲು ಬಹಳ ದೊಡ್ಡದಾಗಿತ್ತು. ಆದರೆ ಅವರು ಸಮಾಧಿಯನ್ನುನೋಡಿದಾಗ ಆ ಕಲ್ಲು ಉರುಳಿರುವುದನ್ನು ಕಂಡರು. ⁵ಅವರು ಸಮಾಧಿಯೊಳಕ್ಕೆ ಪ್ರವೇಶಿಸಿದಾಗ ಉದ್ದವಾದ ಬಿಳಿ ಉಡುಪನ್ನು ತೊಟ್ಟುಕೊಂಡಿದ್ದಯುವಕನೋರ್ವನು ಅಲ್ಲಿ ಬಲಗಡೆ ಕುಳಿತಿರುವುದನ್ನು ಕಂಡು ಭಯಭ್ರಾಂತರಾದರು.  ⁶ಆದರೆ ಅವನು,

“ಭಯಪಡಬೇಡಿರಿ, ಶಿಲುಬೆಗೇರಿಸಿದ್ದ ನಜರೇತಿನ ಯೇಸುವನ್ನು ಹುಡುಕುತ್ತಿದ್ದೀರಿ ಎಂದು ಬಲ್ಲೆ; ಅವರು ಇಲ್ಲಿಲ್ಲ; ಜೀವಂತರಾಗಿ ಎದ್ದಿದ್ದಾರೆ; ಇದೇ ಅವರನ್ನು ಇಟ್ಟ ಸ್ಥಳ; ⁷ಈಗ ನೀವು ಹೋಗಿ, ಪೇತ್ರನಿಗೂ ಮಿಕ್ಕ ಶಿಷ್ಯರಿಗೂ, ‘ಯೇಸು ನಿಮಗೆ ಮೊದಲೇ ಹೇಳಿದಂತೆ ನಿಮಗಿಂತ ಮುಂಚಿತವಾಗಿ ಗಲಿಲೇಯಕ್ಕೆ ಹೋಗುವರು; ಅಲ್ಲಿ ನೀವು ಅವರನ್ನು ಕಾಣುವಿರಿ’ ಎಂದು  ಹೇಳಿರಿ”

ಎಂದನು. ⁸ಅವರು ವಿಸ್ಮಿತರಾಗಿ ಭಯದಿಂದ ನಡುಗುತ್ತಾ ಸಮಾಧಿಯಿಂದ ಹೊರಬಂದು ಬೇಗನೆಅಲ್ಲಿಂದ ಹೊರಟು ಹೋದರು. ಅವರು ಹೆದರಿದ್ದ ಕಾರಣ ಯಾರಿಗೂ ಏನನ್ನೂ ಹೇಳಲಿಲ್ಲ.

ಯೇಸುವಿನ ಶವಸಂಸ್ಕಾರ

(ಮತ್ತಾಯ 28:9-10; ಯೊವಾನ್ನ 20:11-18)

⁹ವಾರದ ಮೊದಲ ದಿನ ಬೆಳಿಗ್ಗೆ ಯೇಸು ಪುನರುತ್ಥಾನರಾಗಿ ಎದ್ದಮೇಲೆ ಮೊಟ್ಟಮೊದಲು ಕಾಣಿಸಿಕೊಂಡದ್ದು ಮಗ್ದಲದ ಮರಿಯಳಿಗೆ. ಅವರು ಹಿಂದೆ ಆಕೆಯಿಂದ ಏಳು ದೆವ್ವಗಳನ್ನು ಬಿಡಿಸಿದ್ದರು. ¹⁰ಆಕೆಯು ಹೋಗಿ ಇನ್ನೂ ಶೋಕಸಾಗರದಲ್ಲೇ ಇದ್ದ ಯೇಸುವಿನ ಸಂಗಡಿಗರಿಗೆಹೇಳಿದಳು. ¹¹ಆದರೆ ಯೇಸುವು ಜೀವಂತರಾಗಿದ್ದಾರೆ ಮತ್ತು ಆಕೆಗೆ ಕಾಣಿಸಿಕೊಂಡಿದ್ದಾರೆ ಎಂಬ ವಾರ್ತೆಯನ್ನು ಕೇಳಿದರೂ ಅದನ್ನು ನಂಬಲಿಲ್ಲ.

ಶಿಷ್ಯರಿಬ್ಬರಿಗೆ ದರ್ಶನ

(ಲೂಕ ೨೪:೧೩-೩೫)

 ¹²ಇದಾದ ಬಳಿಕ ಗ್ರಾಮವೊಂದರತ್ತ ನಡೆದುಹೋಗುತ್ತಿದ್ದ ತಮ್ಮ ಇಬ್ಬರು ಶಿಷ್ಯರಿಗೆ ಯೇಸು ಕಾಣಿಸಿಕೊಂಡರು. ¹³ಅವರು ಹಿಂದಿರುಗಿ ಬಂದು ಉಳಿದವರಿಗೂ ಅದನ್ನು ತಿಳಿಸಿದರು; ಆದರೆ ಅದನ್ನು ಅವರು ನಂಬದೇ ಹೋದರು.

ಪ್ರೇಷಿತರಿಗೆ ಕೊಟ್ಟ ದರ್ಶನ ಹಾಗೂ ಆದೇಶ

(ಮತ್ತಾಯ ೨೮:೧೬-೨೦; ಲೂಕ ೨೪:೩೬-೪೯; ಯೊವಾನ್ನ ೨೦:೧೯-೨೩; ಪ್ರೇ.ಕಾ. ೧:೬-೮)

¹⁴ಅನಂತರ ಹನ್ನೊಂದು ಮಂದಿ ಶಿಷ್ಯರು ಊಟಕ್ಕೆ ಕುಳಿತಿದ್ದಾಗ ಯೇಸುವು ಅವರಿಗೆ ಕಾಣಿಸಿಕೊಂಡರು. ತಾವು ಪುನರುತ್ಥಾನ ಹೊಂದಿದ ಬಳಿಕ ತಮ್ಮನ್ನು ಕಂಡವರ ಮಾತನ್ನು ಅವರು ನಂಬಲಿಲ್ಲವಾದ ಕಾರಣ ಅವರ ಅವಿಶ್ವಾಸವನ್ನೂ, ಹೃದಯದ ಕಾಠಿಣ್ಯವನ್ನೂ ಯೇಸು ಖಂಡಿಸಿದರು. ¹⁵ಬಳಿಕ ಅವರಿಗೆ,

“ನೀವು ವಿಶ್ವದ ಎಲ್ಲೆಡೆಗೂ ಹೋಗಿ ಜಗತ್ತಿಗೆ ಶುಭಸಂದೇಶವನ್ನು ಸಾರಿರಿ. ¹⁶ವಿಶ್ವಾಸಿಸಿ ದೀಕ್ಷಾಸ್ನಾನ* ಮಾಡಿಸಿಕೊಳ್ಳುವವನು ಜೀವೋದ್ಧಾರ ಹೊಂದುವನು. ನಂಬದೆ ಹೋಗುವವನು ದಂಡನೆಗೆ ಗುರಿಯಾಗುವನು. ¹⁷ವಿಶ್ವಾಸಿಸುವುದರಿಂದ ಈ ಅದ್ಭುತಕಾರ್ಯಗಳು ಉಂಟಾಗುವವು. ಅವರು ನನ್ನ ಹೆಸರಿನಲ್ಲಿ ದೆವ್ವಗಳನ್ನು ಬಿಡಿಸುವರು; ಹೊಸ ಭಾಷೆಗಳಲ್ಲಿ ಮಾತನಾಡುವರು; ¹⁸ಅವರುಕೈಗಳಿಂದ ಸರ್ಪಗಳನ್ನು ಎತ್ತಿದರೂ; ವಿಷಪದಾರ್ಥಗಳೇನನ್ನಾದರು ಕುಡಿದರೂ ಅದು ಅವರಿಗೆ ಯಾವ ಕೇಡನ್ನೂ ಮಾಡುವುದಿಲ್ಲ; ಅವರು ರೋಗಿಗಳ ಮೇಲೆ ಕೈಗಳನ್ನಿಟ್ಟರೆ ಅವರು ಗುಣಮುಖರಾಗುವರು”

ಎಂದು ಯೇಸು ಹೇಳಿದರು.

ಸ್ವರ್ಗಾರೋಹಣ

(ಲೂಕ ೨೪:೫೦-೫೩; ಪ್ರೇ.ಕಾ. ೧:೯-೧೧)

¹⁹ಶಿಷ್ಯರು ಎಲ್ಲಡೆಯಲ್ಲಿಯೂ ಶುಭಸಂದೇಶಗಳನ್ನು ಸಾರತೊಡಗಿದರು. ಪ್ರಭು ಯೇಸುವು ಅವರೊಂದಿಗೆ ಕೆಲಸಕಾರ್ಯಗಳನ್ನು ಮಾಡುತ್ತಾ ಅನೇಕ ಅದ್ಭುತಕಾರ್ಯಗಳನ್ನು ಮಾಡುವುದರ ಮುಖಾಂತರ ಶುಭಸಂದೇಶವನ್ನು ಸ್ಥಿರಪಡಿಸುತ್ತಾ ಇದ್ದರು.

ಸಂಕ್ಷಿಪ್ತ ಸಮಾಪ್ತಿ

[**ಆ ಮಹಿಳೆಯರು ಹೋಗಿ ತಾವು ಕೇಳಿದ್ದೆಲ್ಲವನ್ನೂ ಪೇತ್ರನಿಗೂ ಆತನ ಸಂಗಡಿಗರಿಗೂ ಸಣಕ್ಷಿಪ್ತವಾಗಿ ತಿಳಿಸಿದರು. ಅನಂತರ ಯೇಸುವು ಸ್ವತಃ ತಮ್ಮ ಶುಭಸಂದೇಶವನ್ನು ಶಿಷ್ಯರ ಮೂಲಕ ಜಗತ್ತಿನಲ್ಲೆಡೆ ಹರಡುವಂತೆ ಮಾಡಿದರು. ಶಾಶ್ವತ ಜೀವೋದ್ಧಾರವನ್ನೀಯುವ ಈ ಶುಭಸಂದೇಶವು ಪವಿತ್ರ ಹಾಗೂ ಚಿರಂತನವಾದುದು].

* ಅಥವಾ: ಜ್ಞಾನಸ್ನಾನ

**ಕೆಲವು ಮೂಲ ಪ್ರತಿಗಳಲ್ಲಿರುವ ಇನ್ನೊಂದು ಮುಕ್ತಾಯ ವಚನಗಳು.

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ