ಅಧ್ಯಾಯ 15

ಮಾರ್ಕನು ಬರೆದ ಸುಸಂದೇಶಗಳು

ರಾಜ್ಯಪಾಲ ಪಿಲಾತನ ಸಮ್ಮುಖದಲ್ಲಿ ಯೇಸು

(ಮತ್ತಾಯ 27:1-2, 11-14; ಲೂಕ 23:1-5, ಯೊವಾನ್ನ 18;28-38)

¹ಬೆಳಗಾದ ಕೂಡಲೆ, ಪ್ರಧಾನ ಯಾಜಕರು, ಹಿರಿಯ ಮುಖಂಡರೂ, ಧರ್ಮಶಾಸ್ತ್ರಿಗಳೂ ಮತ್ತು ನ್ಯಾಯಸಭೆಯ ಇತರ ಸದಸ್ಯರೊಂದಿಗೆ ಸಮಾಲೋಚನೆ ನಡೆಸಿ, ಯೇಸುವಿಗೆ ಬೇಡಿಯನ್ನು ಹಾಕಿಸಿ ಪಿಲಾತನ ಬಳಿಗೆ ಕರೆದೊಯ್ದು ಆತನಿಗೆ ಒಪ್ಪಿಸಿದರು. ²ಪಿಲಾತನು ಯೇಸುವಿಗೆ,

“ನೀನು ಯೆಹೂದ್ಯರ ಅರಸನೋ?”

ಎಂದು ಕೇಳಲು, ಅವರು ಪ್ರತ್ಯುತ್ತರವಾಗಿ,

“ಅದು ನಿಮ್ಮ ಬಾಯಿಯಿಂದಲೇ ಬಂದಿದೆ,”

ಎಂದು ಉತ್ತರವಿತ್ತರು. ³ಪ್ರಧಾನಯಾಜಕರು ಯೇಸುವಿನ ಮೇಲೆ ಅನೇಕ ದೂರುಗಳನ್ನು ಹೇಳಿದ್ದರು; ಆದುದರಿಂದ ಪಿಲಾತನು ಪುನಃ ಯೇಸುವಿಗೆ,

“ಇವರು ಇಷ್ಟೊಂದು ಆಪಾದನೆಗಳನ್ನು ನಿನ್ನ ಮೇಲೆ ಹೊರಿಸುತ್ತಿರುವಾಗ ನೀನೇನೂ ಉತ್ತರವನ್ನು ಕೊಡುವುದಿಲ್ಲವೇ?”

ಎಂದು ಕೇಳಿದನು. ⁵ಆದರೂ ಯೇಸು ಉತ್ತರಕೊಡದೆ ಇರುವುದನ್ನು ಕಂಡು ಪಿಲಾತನು ಆಶ್ಚರ್ಯಪಟ್ಟನು.

ನಿರಪರಾಧಿಗೆ ಮರಣದಂಡನೆ

(ಮತ್ತಾಯ 27:15-26; ಲೂಕ 23:13-25; ಯೊವಾನ್ನ 18:39, 19:6)

⁶ಪ್ರತಿ ಪಾಸ್ಕಹಬ್ಬದ ಸಂದರ್ಭದಲ್ಲಿ ಜನರು ಕೇಳಿಕೊಂಡ ಒಬ್ಬ ಸೆರೆಯಾಳನ್ನು ಬಿಡುಗಡೆ ಮಾಡುವುದು ಪಿಲಾತನ ಪದ್ಧತಿಯಾಗಿತ್ತು.⁷ಆಗ ದಂಗೆಯೊಂದರಲ್ಲಿ ಕೊಲೆ ಮಾಡಿ ಬಂಧಿಸಲ್ಪಟ್ಟಿದ್ದ ಕೆಲವರು ಸೆರೆಮನೆಯಲ್ಲಿದ್ದರು. ಇವರೊಂದಿಗೆ ಬರಬ್ಬನೆಂಬವನೂ ಸೆರೆಯಲ್ಲಿ ಇದ್ದನು. ⁸ಆಗ ಜನಸಮೂಹವು ಪಿಲಾತನ ಬಳಿಗೆ ಹೋಗಿ, ಪದ್ಧತಿಯಂತೆ ಈ ವರ್ಷವೂ ಒಬ್ಬ ಕೈದಿಯನ್ನು ತಮಗೆ ಬಿಟ್ಟುಕೊಡಬೇಕೆಂದು ಗಟ್ಟಿಯಾಗಿ ಕೇಳಿದಾಗ,  ⁹ಪಿಲಾತನು ಪ್ರತ್ಯುತ್ತರವಾಗಿ ಅವರಿಗೆ,

“ಯೆಹೂದ್ಯರ ಅರಸನನ್ನು ನಿಮಗಾಗಿ ನಾನು ಬಿಟ್ಟುಕೊಡಬೇಕೋ?”

ಎಂದು ಕೇಳಿದನು.¹⁰ಏಕೆಂದರೆ ಪ್ರಧಾನಯಾಜಕರು ಬೇಕೆಂದೇ ಯೇಸುವನ್ನು ತನಗೆ ಒಪ್ಪಿಸಿದ್ದರೆಂದು ಆತನಿಗೆ ತಿಳಿದಿತ್ತು. ¹¹ಆದರೆ ಪ್ರಧಾನಯಾಜಕರು ತಮಗೆ ಬರಬ್ಬನನ್ನೇ ಬಿಟ್ಟುಕೊಡುವಂತೆ ಜನರನ್ನು ಪ್ರೇರೇಪಿಸಿದ್ದನು. ¹²ಆಗ ಪಿಲಾತನು ಪುನಃ ಅವರಿಗೆ,

“ಹಾಗಾದರೆ ನೀವು ಯೆಹೂದ್ಯರ ಅರಸನೆಂದು ಕರೆಯುವ ಈತನಿಗೆ ನಾನೇನು ಮಾಡಬೇಕನ್ನುತ್ತೀರಿ?”

ಎಂದು ಜನರನ್ನು ಕೇಳಿದನು.

¹³”ಆತನನ್ನು ಶಿಲುಬೆಗೆ ಹಾಕಿಸು”

ಎಂದು ಆ ಜನರು ಪುನಃ ಕೂಗಿ ಹೇಳಿದರು. ¹⁴ಆಗ ಪಿಲಾತನು ಅವರಿಗೆ,

“ಏಕೆ? ಇವನೇನು ಮಾಡಿದ್ದಾನೆ?,”

ಎಂದು ಪ್ರಶ್ನಿಸಲು ಅವರು,

“ಅವನನ್ನು ಶಿಲುಬೆಗೇರಿಸು”

ಎಂದು ಮತ್ತಷ್ಟು ಆರ್ಭಟಿಸಿದರು. ¹⁵ಪಿಲಾತನು ಜನರನ್ನು ತೃಪ್ತಿಪಡಿಸಲು ಬರಬ್ಬನನ್ನು ಬರಬ್ಬನನ್ನು ಬಿಡುಗಡೆ ಮಾಡಿಸಿ, ಯೇಸುವನ್ನು ಕೊರಡೆಗಳಿಂದ ಹೊಡಿಸಿ ಶಿಲುಬೆಗೆ ಹಾಕಿಸಲು ಒಪ್ಪಿಸಿದನು.

ಪರಿಹಾಸ್ಯಕ್ಕೆ ಗುರಿಯಾದ ಯೇಸು

(ಮತ್ತಾಯ 27:27-31; ಯೊವಾನ್ನ 19:2-3)

¹⁶ಅನಂತರ ಸೈನಿಕರು ಯೇಸುವನ್ನು ರಾಜಭವನ ಅಂಗಣದೊಳಕ್ಕೆ ಕರೆದುಕೊಂಡು ಹೋಗಿ, ತಮ್ಮ ಪಡೆಯನ್ನು ಒಟ್ಟಿಗೆ ಸೇರಿಸಿ ¹⁷ಯೇಸುವಿಗೆ ನಸುಗೆಂಪು ಬಣ್ಣದ ಮೇಲಂಗಿಯನ್ನು ಹೊದಿಸಿದರು. ಮುಳ್ಳಿನ ಕಿರೀಟವೊಂದನ್ನು ಹೆಣೆದು ಯೇಸುವಿನ ತಲೆಯ ಮೇಲೆ ಇರಿಸಿ

¹⁸”ಯೆಹೂದ್ಯರ ಅರಸನಿಗೆ ಜಯವಾಗಲಿ,”

ಎಂದು ನಾಟಕೀಯವಾಗಿ ವಂದಿಸಿದರು. ¹⁹ಬೆತ್ತದಿಂದ ಅವರ ತಲೆಯ ಮೇಲೆ ಹೊಡೆದು, ಉಗುಳಿ ಮೊಣಕಾಲೂರಿ ವಂದಿಸುವಂತೆ ನಟಿಸಿದರು. ²⁰ಹೀಗೆ ಯೇಸುವನ್ನು ಪರಿಹಾಸ್ಯಮಾಡಿದ ಬಳಿಕ ಆ ನಸುಗೆಂಪು ಬಣ್ಣದ ಮೇಲ್ವಸ್ತ್ರವನ್ನುತೆಗೆದುಹಾಕಿ ಅವರ ಬಟ್ಟೆಗಳನ್ನೇ ಮತ್ತೆ ತೊಡಿಸಿದರು. ಬಳಿಕ ಶಿಲುಬೆಗೇರಿಸಲು ಅವರನ್ನು ಕರೆದೊಯ್ದರು.

ಗೊಲ್ಗೊಥದಲ್ಲಿ ಶಿಲುಬೆ

(ಮತ್ತಾಯ 27:32-44; ಲೂಕ 23:26-43; ಯೊವಾನ್ನ 19:17-27)

²¹ಆಗ ಸಿರೇನ್ಯ ಪಟ್ಟಣದ ಸಿಮೋನ ಎಂಬವನು ಹಳ್ಳಿಯ ಕಡೆಯಿಂದ ಆ ಮಾರ್ಗವಾಗಿ ಬರುತ್ತಿದ್ದನು. ಈತನು ಅಲೆಕ್ಸಾಂಡರ್‌ ಹಾಗೂ ರೂಫ ಎಂಬುವವರ ತಂದೆ. ಯೇಸುವಿನ ಶಿಲುಬೆಯನ್ನು ಹೊರುವಂತೆ ಸೈನಿಕರು ಅವನನ್ನು ಬಲವಂತ ಮಾಡಿದರು. ²²ಬಳಿಕ ‘ಗೊಲ್ಗೊಥಾ’ ಅಂದರೆ ‘ಕಪಾಲ ಸ್ಥಳ’ ಎಂಬರ್ಥದ ಸ್ಥಳಕ್ಕೆ ಅವರು ಯೇಸುವನ್ನು ಕರೆದುಕೊಂಡು ಬಂದರು. ²³ಯೇಸುವಿಗೆ ಅಲ್ಲಿ ರಕ್ತಬೋಳ ಬೆರಸಿದ ದ್ರಾಕ್ಷಾರಸವನ್ನು ಕುಡಿಯಲು ಕೊಡಲಾಯಿತು. ಆದರೆ ಯೇಸುವು ಅದನ್ನು ಸ್ವೀಕರಿಸಲಿಲ್ಲ. ²⁴ಕೊನೆಗೆ ಅವರು ಯೇಸುವನ್ನು ಶಿಲುಬೆಗೆ ಹಾಕಿ,ಬಳಿಕ ಪ್ರತಿಯೊಬ್ಬನು ಯೇಸುವಿನ ಬಟ್ಟೆಗಳನ್ನು ಹಂಚಿಕೊಳ್ಳುವುದಕ್ಕಾಗಿ ಚೀಟು ಹಾಕಿ ಅವುಗಳನ್ನು ಪಾಲುಮಾಡಿಕೊಂಡರು. ²⁵ಯೇಸುವನ್ನು ಶಿಲುಬೆಗೆ ಏರಿಸಿದಾಗ ಮೂರನೆಯ ತಾಸಾಗಿತ್ತು. ²⁶ಯೇಸುವಿನ ಮೇಲೆ ಹೊರಿಸಲ್ಪಟ್ಟ ಆಪಾದನೆಯಂತೆ, ‘ಈತ ಯೆಹೂದ್ಯರ ಅರಸ’ ಎಂಬ ಫಲಕವನ್ನು ಹಾಕಲಾಯಿತು. ²⁷ಯೇಸುವಿನೊಂದಿಗೆ ಇಬ್ಬರು ಕಳ್ಳರನ್ನು ಅವರ ಅಕ್ಕಪಕ್ಕದಲ್ಲೇ ಶಿಲುಬೆಗೆ ಏರಿಸಲಾಯಿತು. ²⁸ಹೀಗೆ ‘ಆತನು ಅಪರಾಧಿಗಳ ಸಾಲಿಗೆ ಸೇರಿಸಲ್ಪಟ್ಟನು’ ಎಂಬ ಪವಿತ್ರಗ್ರಂಥದ ವಾಕ್ಯವು ನೆರವೇರಿತು. ²⁹ಪಕ್ಕದಲ್ಲಿ ಹಾದುಹೋಗುತ್ತಿದ್ದವರು ತಮ್ಮ ತಲೆಗಳನ್ನಾಲ್ಲಾಡಿಸುತ್ತಾ,

“ಆಹಾ! ದೇವಾಲಯವನ್ನು ಕೆಡವಿ ಮೂರೇ ದಿನಗಳಲ್ಲಿ ಅದನ್ನು ಕಟ್ಟುವವನೇ, ³⁰ನಿನ್ನನ್ನು ನೀನೇ ರಕ್ಷಿಸಿಕೊಂಡು ಶಿಲುಬೆಯಿಂದ ಕೆಳಗಿಳಿದು ಬಾ”

ಎಂದು ಹೇಳಿ ಯೇಸುವನ್ನು ನಿಂದಿಸಿದರು. ³¹ಅದೇ ಪ್ರಕಾರ ಪ್ರಧಾನ ಯಾಜಕರೂ ಸಹ ಧರ್ಮಶಾಸ್ತ್ರಿಗಳೊಂದಿಗೆ ಸೇರಿ ಯೇಸುವನ್ನು ಅಪಹಾಸ್ಯಗೈದು,

“ಇತರರನ್ನು ರಕ್ಷಿಸಿದ ಈತನು; ತನ್ನನ್ನು ತಾನೇ ರಕ್ಷಿಸಿಕೊಳ್ಳಲಾರದೇ ಹೋದನು. ³²ಇಸ್ರಾಯೇಲರ ಅರಸನಾದ ಈ ಕ್ರಿಸ್ತನು ಶಿಲುಬೆಯಿಂದ ಇಳಿದು ಬರಲಿ; ಆಗ ನಾವು ನೋಡಿ ನಂಬುತ್ತೇವೆ”

ಎಂದು ತಮ್ಮತಮ್ಮಲ್ಲೇ ಅಂದುಕೊಂಡರು;ಯೇಸುವಿನೊಂದಿಗೆ ಶಿಲುಬೆಗೆ ಹಾಕಲ್ಪಟ್ಟವರೂ ಅದೇ ರೀತಿಯಲ್ಲಿ ಯೇಸುವನ್ನು ಹಂಗಿಸಿದರು.

ಪ್ರಾಣಾರ್ಪಣೆ

(ಮತ್ತಾಯ 27:45-56; ಲೂಕ 23:44-49; ಯೊವಾನ್ನ 19:28-30)

³³ಆರನೇ ತಾಸಿನಿಂದ ಒಂಭತ್ತನೇ ತಾಸಿನವರೆಗೆ ದೇಶದ ಮೇಲೆಲ್ಲಾ ಕತ್ತಲೆ ಕವಿದಿತ್ತು.

³⁴ಒಂಭತ್ತನೆಯ ತಾಸಿನಲ್ಲಿ ಯೇಸುವು,

“ಎಲೋಹಿ, ಎಲೋಹಿ, ಲಮಾ ಸಬಕ್ತಾನೀ?”

ಅಂದರೆ ‘ನನ್ನ ದೇವರೇ, ನನ್ನ ದೇವರೇ, ನನ್ನನ್ನೇಕೆಕೈಬಿಟ್ಟಿದ್ದೀರಿ’ ಎಂದು ಮಹಾಧ್ವನಿಯಿಂದ ಕೂಗಿದರು. ³⁵ಹತ್ತಿರದಲ್ಲಿ ನಿಂತಿದ್ದವರಲ್ಲಿ ಕೆಲವರು ಅದನ್ನು ಕೇಳಿ,

“ಇದೋ, ಇವನು ಎಲೀಯನನ್ನು ಕರೆಯುತ್ತಿದ್ದಾನೆ”

ಎಂದರು. ³⁶ಆಗ ಅವರಲ್ಲೊಬ್ಬನು ಓಡಿ ಹೋಗಿ ಸ್ಪಂಜನ್ನು ಹುಳಿರಸದಲ್ಲಿ ತೋಯಿಸಿ ಅದನ್ನು ಒಂದು ಕೋಲಿನ ತುದಿಗೆ ಸಿಕ್ಕಿಸಿಯೇಸುವಿಗೆ ಕುಡಿಯಲು ಕೊಡುತ್ತಾ,

“ತಾಳಿ, ಇವನನ್ನು ಶಿಲುಬೆಯಿಂದ ಇಳಿಸಲು ಎಲೀಯನು ಬರುವನೋ ನೋಡೋಣ”

ಎಂದನು. ³⁷ಆದರೆ ಯೇಸುವು ಗಟ್ಟಿಯಾಗಿ ಕೂಗಿ ಪ್ರಾಣಬಿಟ್ಟರು. ³⁸ಆಗ ಪ್ರಧಾನ ದೇವಾಲಯದ ತೆರೆಯು ಮೇಲಿನಿಂದ ಕೆಳಗಿನವರೆಗೂ ಇಬ್ಬಾಗವಾಗಿ ಸೀಳಿಹೋಯಿತು.  ³⁹ಯೇಸುವು ಹೀಗೆ ಕೂಗಿ ಪ್ರಾಣ ಬಿಟ್ಟಿದ್ದನ್ನು ಎದುರು ನಿಂತು ನೋಡುತ್ತಿದ್ದ ಶತಾಧಿಪತಿಯು,

“ನಿಜವಾಗಿಯೂ ಈ ಮನುಷ್ಯ ದೇವಪುತ್ರ!”

ಎಂದನು. ⁴⁰ಇದನ್ನು ದೂರದಲ್ಲಿ ನಿಂತು ನೋಡುತ್ತಿದ್ದ ಸ್ತ್ರೀಯರಲ್ಲಿ ಮಗ್ದಲದ ಮರಿಯ, ಚಿಕ್ಕ ಯಕೋಬ ಮತ್ತು ಯೋಸೆಯ ತಾಯಿ ಮರಿಯ ಹಾಗೂ ಸಲೋಮೆ ಸಹ ಇದ್ದರು. ⁴¹ಯೇಸು ಗಲಿಲೇಯದಲ್ಲಿದ್ದಾಗ ಇವರು ಯೇಸುವನ್ನು ಹಿಂಬಾಲಿಸಿ ಉಪಚರಿಸಿದ್ದರು. ಯೇಸುವಿನೊಂದಿಗೆ ಜೆರುಸಲೇಮಿಗೆ ಬಂದಿದ್ದ ಇನ್ನೂ ಅನೇಕ ಸ್ತ್ರೀಯರು ಅಲ್ಲಿದ್ದರು.

ಯೇಸುವಿನ ಶವಸಂಸ್ಕಾರ

(ಮತ್ತಾಯ 27:57-61; ಲೂಕ 23:50-54; ಯೊವಾನ್ನ 19:38-42)

⁴²ಆಗ ಸಂಜೆಯಾಗಿತ್ತು; ಅದು ಸಬ್ಬತ್ತಿನ ಹಿಂದಿನ ಸಿದ್ಧತೆಯ ದಿನವಾಗಿತ್ತು. ⁴³ಆದುದರಿಂದ ಅರಿಮತಾಯ ಎಂಬ ಊರಿನ ಜೋಸೆಫನು ಧೈರ್ಯ ತಂದುಕೊಂಡು ಪಿಲಾತನ ಸನ್ನಿಧಿಗೆ ತೆರಳಿ ಯೇಸುವಿನ ಪಾರ್ಥೀವ ಶರೀರವನ್ನು ತನಗೆ ಕೊಡಿಸಬೇಕೆಂದು ಬೇಡಿಕೊಂಡನು. ದೇವರಸಾಮ್ರಾಜ್ಯದ ಆಗಮನಕ್ಕಾಗಿ ಕಾಯುತ್ತಿದ್ದ ಈತನು ಯೆಹೂದ್ಯರ ನ್ಯಾಯಸಭೆಯ ಸನ್ಮಾನಿತ ಸದಸ್ಯನಾಗಿದ್ದನು. ⁴⁴ಯೇಸು ಇಷ್ಟು ಬೇಗ ಸತ್ತಿದ್ದನ್ನು ಕೇಳಿ ಪಿಲಾತನಿಗೆ ಆಶ್ಚರ್ಯವಾಯಿತು. ಅವನು ಶತಾಧಿಪತಿಯನ್ನು ಕರೆಯಿಸಿ,

“ಯೇಸು ಮೃತನಾಗಿ ಎಷ್ಟು ಸಮಯವಾಯಿತು,”

ಎಂದು ವಿಚಾರಿಸಿದನು. ⁴⁵ಯೇಸು ಸತ್ತಿರುವ ವಿಷಯವನ್ನು ಶತಾಧಿಪತಿಯಿಂದ ಅರಿತ ಮೇಲೆ ಆ ಶರೀರವನ್ನು ಜೋಸೆಫನಿಗೆ ಕೊಡಿಸಿದನು. ⁴⁶ಜೋಸೆಫನು ಶುಭ್ರವಾದ ನಾರು ಮಡಿಯನ್ನು ಕೊಂಡು ತಂದು ಯೇಸುವನ್ನು ಶಿಲುಬೆಯಿಂದ ಇಳಿಸಿ ಆ ನಾರುಮಡಿಯಲ್ಲಿ ಸುತ್ತಿ ಬಂಡೆಯಲ್ಲಿಕೊರೆಸಿದ್ದ ಸಮಾಧಿಯಲ್ಲಿಟ್ಟು ಸಮಾಧಿಯ ಬಾಗಲಿಗೆ ಒಂದು ಕಲ್ಲನ್ನು ಉರುಳಿಸಿದನು. ⁴⁷ಮಗ್ದಲದ ಮರಿಯಳೂ, ಯೋಸೆಯ ತಾಯಿಯಾದ ಮರಿಯಳೂ ಯೇಸುವನ್ನು ಇರಿಸಿದ್ದ ಸಮಾಧಿ ಸ್ಥಳವನ್ನು ಗುರುತಿಸಿಕೊಂಡರು.

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ