ಅಧ್ಯಾಯ 14

ಮಾರ್ಕನು ಬರೆದ ಸುಸಂದೇಶಗಳು

ಯೇಸುವನ್ನು ಕೊಲ್ಲಲು ಒಳಸಂಚು

(ಮತ್ತಾಯ 26:1-5; ಲೂಕ 22:1-2; ಯೊವಾನ್ನ 11:45-53)

¹’ಪಾಸ್ಕಹಬ್ಬ’ ಅಂದರೆ ಹುಳಿರಹಿತ ರೊಟ್ಟಿಯ ಹಬ್ಬವು ಬರುವುದಕ್ಕೆ ಇನ್ನೂ ಎರಡು ದಿನಗಳು ಮಾತ್ರ ಇದ್ದವು. ಪ್ರಧಾನಯಾಜಕರೂ,ಧರ್ಮಶಾಸ್ತ್ರಿಗಳೂ ಉಪಾಯದಿಂದ ಯೇಸುವನ್ನು ಹಿಡಿದು ಕೊಲ್ಲಿಸುವ ಹವಣಿಕೆಯಲ್ಲಿದ್ದರು. ²ಆದರೆ ಹಬ್ಬದ ಸಮಯದಲ್ಲಿ ಅವರು ಈ ಕಾರ್ಯವನ್ನು ಮಾಡಿದರೆ ಜನರು ದಂಗೆ ಏಳಬಹುದು ಎಂದು ತಮ್ಮಲ್ಲೇ ಮಾತನಾಡಿಕೊಂಡು ಸುಮ್ಮನಾದರು.

ಸುಗಂಧ ತೈಲಾಭಿಷೇಕ

(ಮತ್ತಾಯ 26:6-13; ಯೊವಾನ್ನ 12:1-8)

³ಬೆಥಾನಿಯದಲ್ಲಿದ್ದ ಕುಷ್ಠರೋಗಿ ಸಿಮೋನನ ಮನೆಯಲ್ಲಿ ಯೇಸುವು ಊಟಕ್ಕೆ ಕುಳಿತಿದ್ದಾಗ ಒಬ್ಬ ಮಹಿಳೆಯು ಅತಿ ಶ್ರೇಷ್ಠವಾದ ಸುಗಂಧತೈಲದ ಭರಣಿಯೊಂದನ್ನು ತಂದು ಅದನ್ನು ಒಡೆದು ಯೇಸುವಿನ ಶಿರಸ್ಸಿನ ಮೇಲೆ ಸುರಿದಳು. ⁴ಅಲ್ಲಿದ್ದ ಕೆಲವರು ಇದನ್ನು ಕಂಡು ಕೋಪಗೊಂಡು,

 “ಈ ತೈಲವನ್ನು ಹೀಗೆ ವ್ಯರ್ಥಗೊಳಿಸಿದ್ದೇಕೆ? ⁵ಇದನ್ನು ಮುನ್ನೂರು ಬೆಳ್ಳಿಯ ನಾಣ್ಯಗಳಿಗಿಂತ ಹೆಚ್ಚಿನ ಬೆಲೆಗೆ ಮಾರಿ ಬಡವರಿಗೆಕೊಡಬಹುದಾಗಿತ್ತಲ್ಲವೇ?”

ಎಂದು ಆಕೆಯನ್ನು ನಿಂದಿಸಿದರು. ⁶ಅದಕ್ಕೆ ಯೇಸು,

“ಈಕೆಯನ್ನು ಸುಮ್ಮನೆ ಬಿಡಿರಿ; ಏಕೆ ತೊಂದರೆ ಕೊಡುತ್ತೀರಿ?ಈಕೆಯು  ಒಳ್ಳೆಯ ಕಾರ್ಯವನ್ನು ಮಾಡಿದ್ದಾಳೆ. ⁷ಬಡವರು ಸದಾ ನಿಮಗೆ ಸಿಗುತ್ತಾರೆ; ನಿಮಗೆ ಮನಸ್ಸಿದ್ದರೆ ಯಾವಾಗ ಬೇಕಾದರೂ ನೀವು ಅವರಿಗೆ ಸಹಾಯ ಮಾಡಬಹುದು; ಆದರೆ ನಾನು ನಿಮ್ಮ ಸಂಗಡ ಯಾವಾಗಲೂ ಇರುವುದಿಲ್ಲ. ⁸ಆದರೆ ಆಕೆ ತನ್ನಿಂದ ಏನು ಸಾಧ್ಯವೋ ಅದನ್ನು ಮಾಡಿದ್ದಾಳೆ; ನನ್ನ ದೇಹವನ್ನು ಮುಂಚಿತವಾಗಿಯೇ ಶವಸಂಸ್ಕಾರಕ್ಕಾಗಿ ಸಿದ್ಧಪಡಿಸಿದ್ದಾಳೆ. ⁹ನಿಮಗೆ ನಾನು ನಿಶ್ಚಯವಾಗಿ ಹೇಳುತ್ತೇನೆ,ಜಗತ್ತಿನಾದ್ಯಂತ ಎಲ್ಲೆಲ್ಲಿ ಈ ಸುವಾರ್ತೆಯನ್ನು ಸಾರಲಾಗುವುದೋ ಅಲ್ಲೆಲ್ಲಾ ಈಕೆಯ ಸ್ಮರಣಾರ್ಥವಾಗಿ ಈ ಸತ್ಕಾರ್ಯವನ್ನೂ ಸಹ ಹೇಳುವರು,”

ಎಂದರು.

ಸ್ವಾಮಿದ್ರೋಹಕ್ಕೆ ಸಜ್ಜು

(ಮತ್ತಾಯ 26:14-16; ಲೂಕ 22:3-6)

¹⁰ಯೇಸುವಿನ ಹನ್ನೆರಡು ಮಂದಿ ಶಿಷ್ಯರಲ್ಲಿ ಒಬ್ಬನಾದ ಇಸ್ಕರಿಯೋತ ಯೂದನು ಯೇಸುವನ್ನು ಹಿಡಿದು ಕೊಡುವ ದುರುದ್ದೇಶದಿಂದ ಪ್ರಧಾನ ಯಾಜಕನ ಬಳಿಗೆ ಹೋದನು. ¹¹ವಿಷಯವನ್ನು ತಿಳಿದು ಸಂತೋಷಪಟ್ಟ ಅವರು ಕಾರ್ಯಸಾಧಿಸಿದರೆ ಅವನಿಗೆ ಹಣ ಕೊಡುವುದಾಗಿ ವಾಗ್ದಾನ ಮಾಡಿದರು. ಅವನು ಯೇಸುವನ್ನು ಹಿಡಿದುಕೊಡಲು ಸಮಯಕ್ಕಾಗಿ ಕಾಯತೊಡಗಿದನು.

ಗುರುಶಿಷ್ಯರ ಹಬ್ಬದೂಟ

(ಮತ್ತಾಯ 26:17-25; ಲೂಕ 22:7-14; ಯೊವಾನ್ನ 13:21-30)

¹²ಅಂದು ಹುಳಿಯಿಲ್ಲದ ರೊಟ್ಟಿಯ ಹಬ್ಬದ ಮೊದಲನೆಯ ದಿನ ಅಂದರೆ ಪಾಸ್ಕಹಬ್ಬದ ಕುರಿಮರಿಯನ್ನು ಕೊಯ್ಯುವ ದಿನ. ಶಿಷ್ಯರುಯೇಸುವಿನ ಬಳಿ ಬಂದು,

“ತಮಗಾಗಿ ಪಾಸ್ಕ ಭೋಜನವನ್ನು ನಾವೆಲ್ಲಿ ಸಿದ್ಧಪಡಿಸಬೇಕೆನ್ನುತ್ತೀರಿ?”

ಎಂದು ಕೇಳಿದರು. ¹³ಯೇಸುವು ತಮ್ಮ ಶಿಷ್ಯರಲ್ಲಿ ಇಬ್ಬರನ್ನು ಕರೆದು ಅವರಿಗೆ,

“ನೀವು ಪಟ್ಟಣದೊಳಕ್ಕೆ ಹೋಗಿರಿ; ಅಲ್ಲಿ ನೀರಿನ ಕೊಡವನ್ನು ಹೊತ್ತವನನ್ನು ನೀವು ಕಾಣುವಿರಿ; ಅವನನ್ನುನೀವು ಹಿಂಬಾಲಿಸಿರಿ. ¹⁴ಅವನು ಯಾವ ಮನೆಯೊಳಕ್ಕೆ ಹೋಗುತ್ತಾನೋ ಆ ಮನೆಯ ಯಜಮಾನನನ್ನು ಕಂಡು, ‘ನಮ್ಮ ಗುರು, ತಮ್ಮ ಶಿಷ್ಯರ ಜೊತೆಯಲ್ಲಿ ಪಾಸ್ಕಭೊಜನ ಮಾಡಲು ತಮಗೆ ಕೊಠಡಿ ಎಲ್ಲಿ ಎಂದು ಕೇಳುತ್ತಾರೆ’ ಎಂದು ವಿಚಾರಿಸಿರಿ. ¹⁵ಅವನು ಮೇಲುಪ್ಪರಿಗೆಯಲ್ಲಿ ಸಿದ್ಧವಾಗಿರುವ ಸುಸಜ್ಜಿತ ವಿಶಾಲವಾದ ಕೊಠಡಿಯನ್ನು ನಿಮಗೆ ತೋರಿಸುವನು; ಅಲ್ಲಿ ನಮಗೆ ಊಟ ಸಿದ್ಧಮಾಡಿರಿ”

ಎಂದು ಹೇಳಿ ಕಳುಹಿಸಿದರು.¹⁶ಅವರು ಪಟ್ಟಣಕ್ಕೆ ಹೋಗಿ, ಯೇಸು ಹೇಳಿದ ಪ್ರಕಾರ ಎಲ್ಲಾ ವ್ಯವಸ್ಥಿತವಾಗಿರುವುದನ್ನು ಕಂಡು, ಪಾಸ್ಕಭೋಜನವನ್ನು ಸಿದ್ಧಮಾಡಿದರು.

¹⁷ಸಂಜೆಯಾದಾಗ, ಯೇಸುವು ತಮ್ಮ ಹನ್ನೆರಡು ಮಂದಿ ಶಿಷ್ಯರ ಸಂಗಡ ಅಲ್ಲಿಗೆ ಬಂದರು. ¹⁸ಅವರು ಕುಳಿತುಕೊಂಡು ಊಟಮಾಡುತ್ತಿದ್ದಾಗ ಯೇಸುವು ಅವರಿಗೆ,  

“ನನ್ನೊಂದಿಗೆ ಊಟ ಮಾಡುತ್ತಿರುವ ನಿಮ್ಮಲ್ಲಿ ಒಬ್ಬನು ನನ್ನನ್ನು ಹಿಡಿದು ಕೊಡುವನು ಎಂದು ನಾನುನಿಮಗೆ ಸತ್ಯವಾಗಿ ಹೇಳುತ್ತೇನೆ,”

 ಎಂದರು. ¹⁹ಆಗ ಶಿಷ್ಯರು ಕಳವಳಗೊಂಡು, ‘ಅಂಥವನು ನಾನೋ? ನಾನೋ?’ ಎಂದು  ಒಬ್ಬರಾದ ಮೇಲೊಬ್ಬರು ಕೇಳತೊಡಗಿದರು. ²⁰ಅದಕ್ಕೆ ಯೇಸು,

“ಊಟದ ಬಟ್ಟಲಲ್ಲಿ ನನ್ನೊಡನೆ ರೊಟ್ಟಿಯನ್ನು ಅದ್ದುತ್ತಿರುವ ಹನ್ನೆರಡು ಮಂದಿಯಲ್ಲೊಬ್ಬ ಅವನು. ²¹ನರಪುತ್ರನೇನೋ ಪವಿತ್ರಗ್ರಂಥದಲ್ಲಿ ಬರೆದಿರುವ ಪ್ರಕಾರ ಹೊರಟುಹೋಗುತ್ತಾನೆ, ನಿಜ. ಆದರೆ ನರಪುತ್ರನಿಗೆ ದ್ರೋಹ ಬಗೆದವನ ದುರ್ಗತಿಯನ್ನು ಏನೆಂದು ಹೇಳಲಿ? ಆ ಮನುಷ್ಯನು ಹುಟ್ಟದಿದ್ದರೆ ಎಷ್ಟೋ ಚೆನ್ನಾಗಿರುತ್ತಿತ್ತು!”

ಎಂದರು.

ಪವಿತ್ರ ಭೋಜನ

(ಮತ್ತಾಯ 26:26-30; ಲೂಕ 22:15-20; 1ಕೊರಿಂಥ 11:23-25)

²²ಅವರು ಊಟಮಾಡುತ್ತಿರುವಾಗ ಯೇಸು ರೊಟ್ಟಿಯನ್ನು ತೆಗೆದು ದೇವರನ್ನು ಸ್ತುತಿಸಿ ಅದನ್ನು ಮುರಿದು ತಮ್ಮ ಶಿಷ್ಯರಿಗೆ ಕೊಡುತ್ತಾ,

“ಇದನ್ನು ಸ್ವೀಕರಿಸಿ ನೀವು ಭುಜಿಸಿರಿ; ಇದು ನನ್ನ ಶರೀರ”

ಎಂದರು. ²³ಅನಂತರ ಪಾನಪಾತ್ರೆಯನ್ನು ತೆಗೆದುಕೊಂಡು ಕೃತಜ್ಞತಾಸ್ತೋತ್ರವನ್ನು ಸಲ್ಲಿಸಿ ಅದನ್ನು ಅವರಿಗೆ ಕೊಟ್ಟರು; ಅವರೆಲ್ಲರೂ ಅದರಲ್ಲಿದ್ದುದನ್ನು ಕುಡಿದರು. ²⁴ಯೇಸುವು ಅವರಿಗೆ,

“ಇದು ಸಮಸ್ತ ಜನರಿಗಾಗಿ ಸುರಿಸಲ್ಪಡುವಒಡಂಬಡಿಕೆಯ ನನ್ನ ರಕ್ತ.* ²⁵ನಾನು ದೇವರ ಸಾಮ್ರಾಜ್ಯದಲ್ಲಿ ಇದನ್ನು ಹೊಸದಾಗಿ ಕುಡಿಯುವ ಆ ದಿನದವರೆಗೆ ನಾನಿನ್ನು ದ್ರಾಕ್ಷಾರಸವನ್ನುಕುಡಿಯುವುದಿಲ್ಲವೆಂದು ನಿಮಗೆ ನಿಶ್ಚಯವಾಗಿ ಹೇಳುತ್ತೇನೆ,”

ಎಂದರು. ²⁶ಬಳಿಕ ಅವರೆಲ್ಲರೂ ಕೀರ್ತನೆ ಹಾಡುತ್ತಾ ಓಲಿವ್‌ ವೃಕ್ಷಗಳ ಗುಡ್ಡಕ್ಕೆಹೊರಟರು.

ಪೇತ್ರನ ನಿರಾಕರಣೆ

(ಮತ್ತಾಯ 26:31-35; ಲೂಕ 22:31-34; ಯೊವಾನ್ನ 13:36-38)

²⁷ಅನಂತರ ಯೇಸುವು ಅವರಿಗೆ,

“’ಕುರುಬನನ್ನು ಕೊಲ್ಲುವೆನು,

ಕುರಿಗಳು ಚದರುವುವು’

ಎಂದು ಪವಿತ್ರಗ್ರಂಥದಲ್ಲಿ ಬರೆದಿರುವಂತೆ ನೀವೆಲ್ಲರೂ ನನ್ನಲ್ಲಿ ವಿಶ್ವಾಸ ಕಳೆದುಕೊಂಡು ಹಿಮ್ಮೆಟ್ಟುವಿರಿ. ²⁸ನಾನು ಪುನರುತ್ಥಾನ ಹೊಂದಿ ನಿಮಗಿಂತ ಮೊದಲು ಗಲಿಲೇಯಕ್ಕೆ ಹೋಗುವೆನು”,

ಎಂದರು. ²⁹ಆಗ ಪೇತ್ರನು ಯೇಸುವಿಗೆ,

“ಎಲ್ಲರೂ ತಮ್ಮಲ್ಲಿ ವಿಶ್ವಾಸ ಕಳೆದುಕೊಂಡು ಹಿಮ್ಮೆಟ್ಟಿದರೂ ನಾನು ಮಾತ್ರ ಹಾಗೆ ಮಾಡೆನು”,

ಎಂದನು. ³⁰ಅದಕ್ಕೆ ಯೇಸು,

“ಇದೇ ರಾತ್ರಿ ಕೋಳಿಯು ಎರಡು ಸಾರಿ ಕೂಗುವ ಮೊದಲು ನೀನು ನನ್ನನ್ನು ಮೂರು ಸಾರಿ ಅಲ್ಲಗಳೆಯುವೆ, ಎಂದು ನಾನು ನಿನಗೆ ನಿಶ್ಚಯವಾಗಿ ಹೇಳುತ್ತೇನೆ”,

ಎಂದರು. ³¹ಆದರೆ ಪೇತ್ರನು,

“ನಾನು ನಿಮ್ಮಸಂಗಡ ಸಾಯಬೇಕಾಗಿ ಬಂದರೂ ನಿಮ್ಮನ್ನು ನಿರಾಕರಿಸೆನು”,

ಎಂದು ಆವೇಶಭರಿತನಾಗಿ ಹೇಳಿದನು. ಹಾಗೆಯೇ ಉಳಿದವರೂ ಹೇಳಿದರು.

ಗೆತ್ಸೆಮನೆ ತೋಪಿನಲ್ಲಿ ಯೇಸುವಿನ ಮನೋವೇದನೆ

(ಮತ್ತಾಯ 26:36-46; ಲೂಕ 22:39-46)

³²ಆ ನಂತರ ಅವರು ಗೆತ್ಸೆಮನೆ ಎಂಬ ತೋಪಿಗೆ ಬಂದರು. ಯೇಸುವು ತಮ್ಮ ಶಿಷ್ಯರಿಗೆ,

“ನಾನು ಪ್ರಾರ್ಥನೆ ಮಾಡಿ ಬರುವವರೆಗೂನೀವು ಇಲ್ಲಿಯೇ ಕುಳಿತುಕೊಂಡಿರಿ”,

ಎಂದರು. ³³ಪೇತ್ರ, ಯಕೋಬ, ಯೊವಾನ್ನರನ್ನು ತಮ್ಮೊಂದಿಗೆ ಕರೆದುಕೊಂಡು ಮುಂದಕ್ಕೆ ಹೋದರು. ಅಲ್ಲಿ  ಅತೀವ ಮನೋಕ್ಲೇಷದಿಂದ ಚಿಂತಾಕ್ರಾಂತರಾಗಿ,

³⁴”ನನ್ನ ಮನೋವೇದನೆ ಪ್ರಾಣ ಹಿಂಡುವಷ್ಟು ತೀವ್ರವಾಗಿದೆ. ನೀವು ಇಲ್ಲಿಯೇ ಕಾದುಕೊಂಡಿದ್ದುಎಚ್ಚರವಾಗಿರಿ”

ಎಂದರು. ³⁵ಅನಂತರ ಅವರು ಸ್ವಲ್ಪ ಮುಂದಕ್ಕೆ ಹೋಗಿ, ನೆಲದ ಮೇಲೆ ಕುಸಿದು,

“ಸಾಧ್ಯವಾದರೆ ಈ ವಿಷಮ ಗಳಿಗೆಯು ನನ್ನಿಂದ ದೂರವಾಗಲಿ”,

ಎಂದು ದೇವರನ್ನು ಭಿನ್ನೈಸಿಕೊಂಡರು. ³⁶ಬಳಿಕ ಅವರು,

“ಅಪ್ಪಾ, ಪಿತನೇ, ನಿಮಗೆ ಎಲ್ಲವೂ ಸಾಧ್ಯ! ಈ ಕಷ್ಟದ ಕೊಡವನ್ನು ತೆಗೆದುಬಿಡಿ. ಆದರೂ ನನ್ನ ಚಿತ್ತದಂತೆ ಅಲ್ಲ, ನಿಮ್ಮ ಚಿತ್ತವಿದ್ದಂತೆಯೇ ಆಗಲಿ”, 

ಎಂದು ಹೇಳಿದರು. ³⁷ತರುವಾಯ ಹಿಂದಿರುಗಿ ಬಂದು ಆ ಮೂವರು ಶಿಷ್ಯರು ನಿದ್ರೆಮಾಡುವುದನ್ನು ಕಂಡು ಪೇತ್ರನಿಗೆ,

“ಸಿಮೋನನೇ, ನೀನು ನಿದ್ರೆಮಾಡುತ್ತಿರುವೆಯಾ? ಒಂದು ಗಳಿಗೆಯಾದರೂಎಚ್ಚರವಾಗಿರಲು ನಿನಗೆ ಸಾಧ್ಯವಾಗದೇ ಹೋಯಿತೇ? ³⁸ನೀವು ಪ್ರಲೋಭನೆಗೆ ಒಳಗಾಗದಂತೆ ಎಚ್ಚರದಿಂದಿದ್ದು ಪ್ರಾರ್ಥನೆ ಮಾಡಿರಿ`ಆತ್ಮಕ್ಕೇನೋ ಆಸಕ್ತಿಯಿದೆ; ಆದರೆ ದೇಹಕ್ಕೆ ಶಕ್ತಿ ಸಾಲದು”,

ಎಂದರು. ³⁹ಯೇಸುವು ಮರಳಿ ಹಿಂದಕ್ಕೆ ಹೋಗಿ ಮೊದಲು ಪ್ರಾರ್ಥನೆ ಮಾಡಿದಂತೆಯೇ ಮಾಡಿದರು. ⁴⁰ಪುನಃ ಅವರು ಶಿಷ್ಯರ ಬಳಿಗೆ ಹಿಂತಿರುಗಿ ಬಂದಾಗ ಅವರು ಇನ್ನೂ ನಿದ್ರಾವಸ್ಥೆಯಲ್ಲಿದ್ದರು; ಅವರ ಕಣ್ಣುಗಳು ಬಹುಭಾರವಾಗಿದ್ದವು. ಏನು ಹೇಳಬೇಕೆಂದು ಯೇಸುವಿಗೆ ತಿಳಿಯದೇ ಹೋಯಿತು. ⁴¹ಅವರು ಮೂರನೆಯ ಸಾರಿ ಅವರ ಬಳಿ ಬಂದು,

“ನೀವಿನ್ನೂ ನಿದ್ರಿಸಿ ವಿಶ್ರಮಿಸುತ್ತಿರುವಿರಾ? ಸಾಕು, ಸಮಯವು ಸಮೀಪಿಸಿತು. ನರಪುತ್ರನು ದುರ್ಜನರ ಕೈವಶನಾಗಲಿದ್ದಾನೆ. ⁴²ಎದ್ದೇಳಿ, ಹೋಗೋಣ;ಇದೋ,  ನನ್ನನ್ನು ಹಿಡಿದುಕೊಡುವವನು ಸಮೀಪಿಸಿದ್ದಾನೆ”,

ಎಂದು ಹೇಳಿದರು.

ಯೂದನ ಗುರುದ್ರೋಹ

(ಮತ್ತಾಯ 26:47-56; ಲೂಕ 22:47-53; ಯೊವಾನ್ನ 18:2-18)

⁴³ಯೇಸುವು ಶಿಷ್ಯರೊಂದಿಗೆ ಮಾತನಾಡುತ್ತಿರುವಾಗಲೇ ಹನ್ನೆರಡು ಮಂದಿ ಶಿಷ್ಯರಲ್ಲಿ ಒಬ್ಬನಾದ ಯೂದನು ಅಲ್ಲಿಗೆ ಬಂದನು. ಖಡ್ಗ ಮತ್ತು ಲಾಠಿಗಳನ್ನು ಹಿಡಿದ ಒಂದು ಗುಂಪು ಅವನಿಂದಿಗಿತ್ತು. ಪ್ರಧಾನ ಯಾಜಕರೂ, ಧರ್ಮಶಾಸ್ತ್ರಿಗಳೂ ಮತ್ತು ಊರ ಪ್ರಮುಖರು ಅವರನ್ನು ಕಳುಹಿಸಿದ್ದರು. ⁴⁴ಗುರುದ್ರೋಹಿ ಯೂದನು ತನ್ನ ಸಂಗಡ ಬಂದಿದ್ದವರಿಗೆ,

“ನಾನು ಯಾರಿಗೆ ಮುದ್ದಿಡುತ್ತೇನೋ ಆತನೇ ಆ ವ್ಯಕ್ತಿ; ಆತನನ್ನುಹಿಡಿದು ಭದ್ರವಾಗಿ ತೆಗೆದುಕೊಂಡು ಹೋಗಿರಿ”

ಎಂದು ಮುಂಚೆಯೇ ಸೂಚನೆಯನ್ನು ಕೊಟ್ಟಿದ್ದನು` ⁴⁵ಅದರಂತೆಯೇ ಅವನು ಅಲ್ಲಿಗೆ ಬಂದ ಕೂಡಲೆ ನೇರವಾಗಿ ಯೇಸುವಿನ ಬಳಿಗೆ ಹೋಗಿ,

 “ಗುರುದೇವ”

ಎನ್ನುತ್ತಾ ಯೇಸುವಿಗೆ ಮುದ್ದಿಟ್ಟನು. ⁴⁶ತಕ್ಷಣವೇ ಆ ಜನರು ಯೇಸುವನ್ನು ಹಿಡಿದು ಬಂಧಿಸಿದರು. ⁴⁷ಆಗ ಹತ್ತಿರ ನಿಂತಿದ್ದವರಲ್ಲಿ ಒಬ್ಬನು ತನ್ನ ಕತ್ತಿಯನ್ನು ಹಿರಿದು ಪ್ರಧಾನ ಯಾಜಕನ ಆಳನ್ನು ಹೊಡೆದು, ಅವನ ಕಿವಿಯನ್ನು ಕತ್ತರಿಸಿ ಬಿಟ್ಟನು. ⁴⁸ಯೇಸುವು ಅಲ್ಲಿಗೆ ಬಂದಿದ್ದ ಆ ಗುಂಪಿಗೆ,

 “ದರೋಡೆಕೋರನನ್ನು ಹಿಡಿಯುವುದಕ್ಕೆ ಎಂಬಂತೆ ನನ್ನನ್ನು ಬಂಧಿಸಲು ಕತ್ತಿಗಳನ್ನು ಮತ್ತು ಮಾಡುತ್ತಿದ್ದೆ; ಆಗ ನೀವು ನನ್ನನ್ನು ಬಂಧಿಸಲಿಲ್ಲ. ⁴⁹ಆದರೆ ಪವಿತ್ರಗ್ರಂಥದಲ್ಲಿ ಬರೆದಿರುವುದು ನೆರವೇರುವಂತೆ ಇವೆಲ್ಲಾ ಸಂಭವಿಸಿದೆ”,

ಎಂದರು. ⁵⁰ಆಗ ಯೇಸುವಿನ ಶಿಷ್ಯರೆಲ್ಲರೂ ಅವರನ್ನು ಬಿಟ್ಟು ಓಡಿಹೋದರು. ⁵¹ಮೈಮೇಲೆ ದುಪ್ಪಟಿಯನ್ನು ಮಾತ್ರ ಸುತ್ತಿಕೊಂಡಿದ್ದ ಯುವಕನೊಬ್ಬನು ಯೇಸುವನ್ನು ಹಿಂಬಾಲಿಸುತ್ತಿದ್ದನು. ಅವನನ್ನು ಹಿಡಿಯಲು ಆ ಜನರು ಯತ್ನಿಸಿದಾಗ ⁵²ಅವನು ಆ ದುಪ್ಪಟಿಯನ್ನು ಬಿಟ್ಟು ಬರಿ ಮೈಯಲ್ಲಿ ಓಡಿಹೋದನು.

ಉಚ್ಚನ್ಯಾಯ ಸಭೆಯ ಮುಂದೆ ಯೇಸು

(ಮತ್ತಾಯ 26:57-68; ಲೂಕ 22:54-55, 63-71; ಯೊವಾನ್ನ 18:13-14, 19-24)

⁵³ಇದಾದ ಮೇಲೆ ಅವರು ಯೇಸುವನ್ನು ಪ್ರಧಾನಯಾಜಕನ ಬಳಿಗೆ ಕರೆದುಕೊಂಡು ಹೋದರು; ಅಲ್ಲಿ ಎಲ್ಲಾ ಮುಖ್ಯಯಾಜಕರೂ, ಪ್ರಮುಖರೂ, ಧರ್ಮಶಾಸ್ತ್ರಿಗಳೂ ಸಭೆ ಸೇರಿದ್ದರು. ⁵⁴ಪೇತ್ರನು ದೂರದಿಂದಲೇ ಯೇಸುವನ್ನು ಹಿಂಬಾಲಿಸುತ್ತಾ ಇದ್ದನು. ಅವನು ಪ್ರಧಾನಯಾಜಕನ ಭವನದವರೆಗೂ ಬಂದು ಅಲ್ಲಿದ್ದ ಪಹರೆಯವರ ಸಂಗಡ ಕುಳಿತು ಚಳಿಕಾಯಿಸಿಕೊಳ್ಳುತ್ತಿದ್ದನು. ⁵⁵ಅತ್ತ ಪ್ರಧಾನಯಾಜಕರೂ, ಉಚ್ಚನ್ಯಾಯಸಭೆಯವರೂ ಸೇರಿ ಯೇಸುವನ್ನು ಕೊಲ್ಲಿಸಲು ಅವರ ವಿರುದ್ಧ ಸಾಕ್ಷಿ ಹುಡುಕುತ್ತಿದ್ದರು. ಆದರೆ ಅವರಿಗೆ ಸರಿಯಾದ ಒಂದು ಸಾಕ್ಷ್ಯವೂ ಲಭಿಸಲಿಲ್ಲ. ⁵⁶ಅನೇಕರು ಮುಂದೆ ಬಂದು ಯೇಸುವಿನ ವಿರುದ್ಧ ಸುಳ್ಳುಸಾಕ್ಷಿ ಹೇಳಿದರಾದರೂ ಅವರ ಸಾಕ್ಷ್ಯ ಒಂದಕ್ಕೊಂದು ಸರಿಬೀಳಲಿಲ್ಲ. ⁵⁷ಕೆಲವರು ಎದ್ದು, ⁵⁸”’ಕೈಗಳಿಂದ ಕಟ್ಟಿರುವ ಈ ಮಹಾದೇವಾಲಯವನ್ನು ನಾನು ಕೆಡವಿ ಕೈಯಿಂದ ಕಟ್ಟದ ಇನ್ನೊಂದನ್ನು ಮೂರು ದಿನಗಳಲ್ಲಿಕಟ್ಟುವೆನು’ ಎಂದು ಈತನು ಹೇಳಿದ್ದನ್ನು ನಾವು ಕೇಳಿಸಿಕೊಂಡಿದ್ದೇವೆ”, ಎಂದರು. ⁵⁹ಹೀಗಿದ್ದರೂ ಅವರ ಸಾಕ್ಷಿಗಳು  ಒಂದಕ್ಕೊಂದು ಸರಿಹೋಗಲಿಲ್ಲ.

⁶⁰ಆಗ ಪ್ರಧಾನಯಾಜಕನು ಎದ್ದು ನಿಂತು ಯೇಸುವನ್ನು ನೋಡಿ,

“ಈ ಜನರು ನಿನ್ನ ವಿರುದ್ಧವಾಗಿ ತಂದ ಆರೋಪಗಳನ್ನು ಕೇಳುತ್ತಿರುವೆಯಾ? ಇವುಗಳಿಗೆ ನಿನ್ನ ಉತ್ತರವೇನು?”,

ಎಂದು ಕೇಳಿದನು. ⁶¹ಆದರೆ ಯೇಸುವು ಯಾವ ಉತ್ತರವನ್ನೂ ಕೊಡದೆ ಮೌನವಾಗಿದ್ದರು.ಪ್ರಧಾನಯಾಜಕನು ಮತ್ತೆ,

“ಸ್ತುತ್ಯ ಆ ದೇವರಪುತ್ರ ಹಾಗೂ ಅಭಿಷಿಕ್ತ ಲೋಕೊದ್ಧಾರಕ ನೀನೇನೋ?,”

ಎಂದು ಯೇಸುವನ್ನು ಕೇಳಿದನು.⁶²ಅದಕ್ಕೆ ಯೇಸುವು,

“ಹೌದು ಅದು ನಾನೇ, ಅಲ್ಲದೆ ನರಪುತ್ರನು ಸರ್ವಶಕ್ತ ದೇವರ ಬಲಪಾರ್ಶ್ವದಲ್ಲಿ ಆಸೀನನಾಗಿರುವದನ್ನೂ, ಆಕಾಶದಮೇಘಗಳಲ್ಲಿ ಬರುವುದನ್ನೂ ನೀವು ನೋಡುವಿರಿ,”

ಎಂದರು. ⁶³ಒಡನೆಯೇ ಪ್ರಧಾನಯಾಜಕನು ತನ್ನ ಬಟ್ಟೆಗಳನ್ನು ಹರಿದುಕೊಂಡು, ಇನ್ನು ನಮಗೆ ಹೆಚ್ಚಿನ ಸಾಕ್ಷಿಗಳ ಅವಶ್ಯಕತೆ ಏನಿದೆ? ⁶⁴ಈತನಾಡಿದ ದೇವದೂಷಣೆಯನ್ನು ನೀವೇ ಕೇಳಿದ್ದೀರಿ! ನಿಮ್ಮ ಅಭಿಪ್ರಾಯವೇನು?,”

ಎಂದು ಸಭೆಯನ್ನು ಕೇಳಿದನು. ಅವರೆಲ್ಲರೂ,

“ಇವನಿಗೆ ಮರಣದಂಡನೆ ಆಗಬೇಕು,”

ಎಂದು ತೀರ್ಮಾನವಿತ್ತರು. ⁶⁵ತರುವಾಯ ಅವರಲ್ಲಿ ಕೆಲವರು ಯೇಸುವಿನ ಮೇಲೆ ಉಗುಳಿ ಅವರ ಮುಖಕ್ಕೆ ಮುಸುಕನ್ನು ಹಾಕಿ ಗುದ್ದಿ,

 “ನಿನ್ನನ್ನು ಗುದ್ದಿದವರು ಯಾರು? ಪ್ರವಾದಿಸಿ ಹೇಳು,”

ಎನ್ನುತ್ತಿದ್ದರು. ಅಲ್ಲದೆ ಅಲ್ಲಿದ್ದ ಪಹರೆಯವರೂ ಅವರಿಗೆ ಏಟನ್ನು ಕೊಟ್ಟು, ತಮ್ಮ ವಶಕ್ಕೆ ತೆಗೆದುಕೊಂಡರು.

ಅವನಾರೋ ನಾನರಿಯೆ

(ಮತ್ತಾಯ 26:69-75; ಲೂಕ 22:56-62; ಯೊವಾನ್ನ 18:15-18, 25-27)

⁶⁶ಪೇತ್ರನು ಭವನದ ಬಳಿಯಲ್ಲಿದ್ದಾಗ ಪ್ರಧಾನಯಾಜಕನ ಸೇವಕಿಯೊಬ್ಬಳು ಅಲ್ಲಿಗೆ ಬಂದಳು. ⁶⁷ಚಳಿಕಾಯಿಸಿಕೊಳ್ಳುತ್ತಿದ್ದ ಪೇತ್ರನನ್ನು ಕಂಡು ಅವನನ್ನು ದೃಷ್ಟಿಸಿ ನೋಡಿ,

“ನೀನು ಸಹ ಆ ನಜರೇತಿನ ಯೇಸುವಿನೊಂದಿಗೆ ಇದ್ದವನಲ್ಲವೇ?”

ಎಂದು ಕೇಳಿದಳು. ⁶⁸ಆದರೆ ಪೇತ್ರನುಅವಳು ಹೇಳಿದ್ದನ್ನು ಅಲ್ಲಗಳೆದನು.

“ನನಗೆ ಗೊತ್ತಿಲ್ಲ, ನೀನೇನು ಹೇಳುತ್ತೀಯೋ ನನಗೆ ತಿಳಿಯದು,”

ಎಂದು ಹೇಳಿ ಅಲ್ಲಿಂದ ಎದ್ದು ಹೊರಗಿನ ದ್ವಾರಮಂಟಪದ ಬಳಿಗೆ ಹೋದನು (ಆಗ ಕೋಳಿಯು ಕೂಗಿತು). ⁶⁹ಆ ದಾಸಿಯು ಅಲ್ಲಿಯೂ ಅವನನ್ನು ನೋಡಿ ಪಕ್ಕದಲ್ಲಿ ನಿಂತಿದ್ದವರಿಗೆ,

“ಇವನುಸಹ ಅವರಲ್ಲಿ ಒಬ್ಬನು,”

ಎಂದು ತಿಳಿಸಿದಳು. ಪೇತ್ರನು ಪುನಃ ಆಕೆ ಹೇಳಿದ್ದನ್ನು ನಿರಾಕರಿಸಿದನು. ⁷⁰ತುಸು ಹೊತ್ತಾದ ಬಳಿಕ ಪಕ್ಕದಲ್ಲಿ ನಿಂತಿದ್ದವನು ಪೇತ್ರನತ್ತ ತಿರುಗಿ,

 “ನಿಜವಾಗಿಯೂ ನೀನು ಅವರಲ್ಲಿ ಒಬ್ಬನು; ಏಕೆಂದರೆ ನೀನೂ ಗಲಿಲೇಯದವನೇ. ನಿನ್ನ ಭಾಷೆ ಅದನ್ನ ಸ್ಥಿರಪಡಿಸುತ್ತದೆ,”

ಎಂದನು. ⁷¹ಆಗ ಪೇತ್ರನು,

“ನೀವು ಹೇಳುವ ಆ ಮನುಷ್ಯ ಯಾರೆಂದು ನಾನರಿಯೆ,”

ಎಂದು ಹೇಳಿ ಆಣೆಯಿಡುವುದಕ್ಕೂ, ಶಪಿಸುವುದಕ್ಕೂ ತೊಡಗಿದನು. ಆ ಕೂಡಲೇ ಕೋಳಿ ಎರಡನೆಯ ಸಲ ಕೂಗಿತು. ⁷²ಎರಡು ಸಾರಿ ಕೋಳಿ  ಕೋಳಿ ಕೂಗುವುದಕ್ಕಿಂತಮುಂಚಿತವಾಗಿ, ‘ನೀನು ನನ್ನನ್ನು ಮೂರು ಸಾರಿ ನಿರಾಕರಿಸುವೆ,’ ಎಂದು ಯೇಸು ಹೇಳಿದ ಮಾತು ಪೇತ್ರನ ನೆನಪಿಗೆ ಬಂದು ಅವನು ಬಿಕ್ಕಿ ಬಿಕ್ಕಿಅತ್ತನು.

 

*ಕೆಲವು ಪ್ರತಿಗಳಲ್ಲಿ ‘ಹೊಸ ಒಡಬಡಿಕೆಯ ರಕ್ತ’ ಎಂದಿದೆ.

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ