ಅಧ್ಯಾಯ 13

ಮಾರ್ಕನು ಬರೆದ ಸುಸಂದೇಶಗಳು

ದೇವಾಲಯದ ವಿನಾಶದ ಮುನ್ಸೂಚನೆ

(ಮತ್ತಾಯ 24:1-2; ಲೂಕ 21:5-6)

¹ಯೇಸುವು ದೇವಾಲಯದೊಳಗಿನಿಂದ ಹೊರಬರುತ್ತಿದ್ದಾಗ ಅವರ ಶಿಷ್ಯರಲ್ಲಿ ಒಬ್ಬನು ಅವರಿಗೆ,

"ಬೋಧಕರೇ, ಇಲ್ಲಿ ನೋಡಿ, ಎಂಥಾ ಭಾರಿ ಕಲ್ಲುಗಳು! ಎಂಥಾ ಕಟ್ಟಡಗಳು!"

ಎಂದನು. ²ಯೇಸುವು ಅವನಿಗೆ ಪ್ರತ್ಯುತ್ತರವಾಗಿ,

"ನೀನಿಲ್ಲಿ ಈ ದೊಡ್ಡ ಕಟ್ಟಡಗಳನ್ನು ನೋಡುತ್ತಿರುವೆಯಲ್ಲಾ? ಇಲ್ಲಿ ಕಲ್ಲಿನ ಮೇಲೆ ಕಲ್ಲು ಉಳಿಯುವುದಿಲ್ಲ. ಎಲ್ಲವನ್ನೂ ಕೆಡವಿಹಾಕುವರು,"

 ಎಂದರು.

ಸೈರಣೆಯಿಂದ ರಕ್ಷಣೆ

(ಮತ್ತಾಯ 24:3-8; ಲೂಕ 21:7-11)

         ³ಯೇಸುವು ಎಣ್ಣೆ ಮರಗಳ ಗುಡ್ಡದ ಮೇಲೆ ದೇವಾಲಯಕ್ಕೆ ಎದುರಾಗಿ ಕುಳಿತುಕೊಂಡಿದ್ದರು. ಆಗ ಪೇತ್ರ, ಯಕೋಬ, ಯೊವಾನ್ನ, ಅಂದ್ರೆಯ ಇವರುಗಳು ಪ್ರತ್ಯೇಕವಾಗಿಯೇಸುವನ್ನು ಕಂಡು ಅವರಿಗೆ,

⁴“ಇವೆಲ್ಲಾ ಯಾವಾಗ ಸಂಭವಿಸುವುವು? ಇವೆಲ್ಲವುಗಳು ನೆರವೇರುವದಕ್ಕೆ ಯಾವ ಮುನ್ಸೂಚನೆ ಇದೆ? ನಮಗೆ ತಿಳಿಸಿ”

ಎಂದು ಕೇಳಿಕೊಂಡರು. ⁵ಅದಕ್ಕೆ ಯೇಸು ಪ್ರತ್ಯುತ್ತರವಾಗಿ ಅವರಿಗೆ,

“ಯಾರಾದರೂ ನಿಮ್ಮನ್ನು ಮೋಸಗೊಳಿಸದಂತೆ ಎಚ್ಚರಿಕೆಯಿಂದಿರಿ;  ⁶ಏಕೆಂದರೆ ಅನೇಕರು ನನ್ನ ಹೆಸರಿನಲ್ಲಿ ಬಂದು, ‘ನಾನೇ ಕ್ರಿಸ್ತನು’ ಎಂದು ಹೇಳಿ ಅನೇಕರನ್ನು ಮೋಸಗೊಳಿಸುವರು. ⁷ಇದಲ್ಲದೆ ಯುದ್ಧಗಳ ವಿಷಯವನ್ನೂ, ಯುದ್ಧಗಳ ಸುದ್ಧಿಯನ್ನೂ ನೀವು ಕೇಳಿ ಕಳವಳಪಡಬೇಡಿರಿ. ಅವುಗಳು ನಡೆಯುವುದುಅಗತ್ಯ; ಆದರೆ ಅದೇ ಅಂತ್ಯವಲ್ಲ. ⁸ಜನಾಂಗಕ್ಕೆ ವಿರೋಧವಾಗಿ ಜನಾಂಗವೂ ರಾಷ್ಟ್ರಕ್ಕೆ ವಿರೋಧವಾಗಿ ರಾಷ್ಟ್ರವೂ ದಂಗೆ ಏಳುವುವು; ಹಲವು ಕಡೆಗಳಲ್ಲಿ ಭೂಕಂಪಗಳಾಗುವುವು.ಇದಲ್ಲದೆ ಬರಗಾಲಗಳು, ಕ್ಷಾಮಡಾಮರಗಳು ತಲೆದೋರುವುವು. ಇವೆಲ್ಲವೂ ಪ್ರಸವ ಕಾಲದ ಪ್ರಾರಂಭ ಮಾತ್ರ. ⁹ನೀವು ನಿಮ್ಮ ವಿಷಯದಲ್ಲಿ ಎಚ್ಚರಿಕೆಯಿಂದಿರಿ; ನಿಮ್ಮನ್ನು ನ್ಯಾಯವಿಚಾರಣೆಯ ಸಭೆಗಳಿಗೆ ಒಪ್ಪಿಸುವರು; ಪ್ರಾರ್ಥನಾಮಂದಿರಗಳಲ್ಲಿ ನಿಮ್ಮನ್ನು ಹೊಡೆಯುವರು; ನನ್ನನಿಮಿತ್ತ ನೀವು ಅಧಿಕಾರಿಗಳ ಮತ್ತು ಅರಸರ ಮುಂದೆ ನಿಲ್ಲಬೇಕಾಗುವುದು. ಅವರ ಮುಂದೆ ನೀವು ನನಗೆ ಸಾಕ್ಷಿಗಳಾಗುವಿರಿ. ¹⁰ಸುವಾರ್ತೆಯನ್ನು ಮೊದಲು ಎಲ್ಲಾ ಜನಾಂಗಗಳಿಗೆಸಾರುವುದು ಅಗತ್ಯವಾಗಿದೆ. ¹¹ನಿಮ್ಮನ್ನು ಬಂಧಿಸಿ ತೆಗೆದುಕೊಂಡು ಹೋಗುವಾಗ ನೀವು ಏನು ಮಾತನಾಡಬೇಕೆಂಬುದನ್ನು ಮುಂಚಿತವಾಗಿ ಚಿಂತಿಸಬೇಡಿರಿ, ಆಲೋಚಿಸಲೂಬೇಡಿರಿ; ಆದರೆ ಆ ಗಳಿಗೆಯಲ್ಲಿ ನಿಮಗೆ ಅನುಗ್ರಹಿಸಲಾಗಿರುವ ಮಾತುಗಳನ್ನೇ ನುಡಿಯಿರಿ; ಏಕೆಂದರೆ ಮಾತನಾಡುವವರು ನೀವಲ್ಲ; ಪವಿತ್ರಾತ್ಮರೇ. ¹²ಸಹೋದರನುಸಹೋದರನನ್ನೂ, ತಂದೆಯು ಮಗನನ್ನೂ ಮರಣಕ್ಕೆ ಒಪ್ಪಿಸುವರು; ಮಕ್ಕಳು ತಮ್ಮ ತಂದೆತಾಯಿಗಳ ವಿರುದ್ಧವಾಗಿ ನಿಂತು ಅವರನ್ನು ಕೊಲ್ಲಿಸಲು ಕಾರಣರಾಗುವರು. ¹³ನನ್ನಹೆಸರಿನ ನಿಮಿತ್ತವಾಗಿ ಎಲ್ಲರೂ ನಿಮ್ಮೊಂದಿಗೆ ಹಗೆತನ ಮಾಡುವರು. ಆದರೆ ಕಡೆಯವರೆಗೂ ತಾಳುವವನೇ ರಕ್ಷಣೆ ಹೊಂದುವನು”

¹⁴”ಪ್ರವಾದಿಯಾದ ದಾನಿಯೇಲನು ಹೇಳಿದಂತೆ ಹಾಳು ಮಾಡುವ ಅಸಹ್ಯವು ನಿಲ್ಲಬಾರದ ಸ್ಥಳದಲ್ಲಿ ನಿಂತಿರುವುದನ್ನು ನೀವು ಕಾಣುವಾಗ (ಓದುವವನು ತಿಳಿದುಕೊಳ್ಳಲಿ)ಜುದೇಯದಲ್ಲಿ ಇರುವವರು ಬೆಟ್ಟಗಳಿಗೆ ಓಡಿಹೋಗಲಿ. ¹⁵ಮನೆಯ ಮಾಳಿಗೆಯ ಮೇಲಿದ್ದವನು ಕೆಳಕ್ಕೆ ಇಳಿಯಲಿ; ಮನೆಯಿಂದ ಏನನ್ನೂ ತೆಗೆದುಕೊಳ್ಳಲು ಯತ್ನಿಸದೆ ಓಡಿಹೋಗಲಿ. ¹⁶ಹೊಲದಲ್ಲಿರುವವನು ಮತ್ತೆ ತನ್ನ ಹೊದಿಕೆಯನ್ನು ತೆಗೆದುಕೊಳ್ಳಲು ಹಿಂದಿರುಗದಿರಲಿ. ¹⁷ಆದರೆ ಅಯ್ಯೋ! ಆ ದಿನಗಳಲ್ಲಿ ಗರ್ಭಿಣಿಯರ ಮತ್ತು ಹಾಲೂಡಿಸುವ ತಾಯಿಂದಿರ ಗೋಳೇನು? ¹⁸ಈ ಸಂಕಷ್ಟಗಳು ಚಳಿಗಾಲದಲ್ಲಿ ಆಗದಂತೆ ನೀವು ಪ್ರಾರ್ಥಿಸಿರಿ. ¹⁹ಆಗ ಬರಲಿರುವ ಸಂಕಷ್ಟಗಳು ದೈವ ಸೃಷ್ಟಿಯ ಆದಿಯಿಂದ ಇರಲಿಲ್ಲ. ಇನ್ನು ಮುಂದಕ್ಕೂ ಇರುವುದಿಲ್ಲ. ²⁰ಕರ್ತನು ಆ ದಿನಗಳ ಅವಧಿಯನ್ನು ಕಡಿಮೆ ಮಾಡದಿದ್ದರೆ ಯಾವ ಮಾನವನೂ ರಕ್ಷಣೆ ಹೊಂದುವದಿಲ್ಲ. ಆದರೆ ತಾವು ಆರಿಸಿದವರಿಗಾಗಿ ಆ ದಿನಗಳ ಅವಧಿಯನ್ನು ಕಡಿಮೆ ಮಾಡಿದ್ದಾರೆ. ²¹ಆಗ ಯಾರಾದರೂ ನಿಮಗೆ, ‘ಇದೋ, ಕ್ರಿಸ್ತನು ಇಲ್ಲಿದ್ದಾನೆ; ಅದೋ, ಕ್ರಿಸ್ತನು ಅಲ್ಲಿದ್ದಾನೆ” ಎಂದು ಹೇಳಿದರೆ ಅವರನ್ನು ನಂಬಬೇಡಿರಿ; ²²ಸುಳ್ಳುಕ್ರಿಸ್ತರೂ, ಸುಳ್ಳುಪ್ರವಾದಿಗಳೂ ಎದ್ದು ಆರಿಸಲ್ಪಟ್ಟವರನ್ನೂ ಮೋಸಗೊಳಿಸುವುದಕ್ಕಾಗಿ ಸೂಚಕಕಾರ್ಯಗಳನ್ನೂ, ಅದ್ಭುತ ಕಾರ್ಯಗಳನ್ನೂ ಮಾಡಿ ತೋರಿಸುವರು. ²³ಆದರೆ ನೀವುಎಚ್ಚರಿಕೆಯಿಂದಿರಿ. ನಾನು ನಿಮಗೆ ಎಲ್ಲವುಗಳನ್ನೂ ಮುಂಚಿತವಾಗಿಯೇ ಹೇಳಿದ್ದೇನೆ.”

ನರಪುತ್ರನ ಪುನರಾಗಮನ

(ಮತ್ತಾಯ 24:29-31; ಲೂಕ 21:25-28)

²⁴”ಆ ದಿನಗಳಲ್ಲಿ ಸಂಕಷ್ಟಗಳು ತೀರಿದ ನಂತರ ಸೂರ್ಯನು ಅಂಧಕಾರಮಯನಾಗುವನು; ಚಂದ್ರನು ಕಾಂತಿಹೀನನಾಗುವನು. ²⁵ಆಕಾಶದ ನಕ್ಷತ್ರಗಳು ಬೀಳುವವುಮತ್ತು ಗ್ರಹಶಕ್ತಿಗಳು ಕಂಪಿಸುವುವು. ²⁶ಆಗ ನರಪುತ್ರನು ಮಹಾಶಕ್ತಿಯಿಂದಲೂ, ಮಹಿಮೆಯಿಂದಲೂ ಮೇಘಗಳಲ್ಲಿ ಬರುವುದನ್ನು ಜನರು ಕಾಣುವರು. ²⁷ಆತನು ತನ್ನದೇವದೂತರನ್ನು ನಾಲ್ಕೂ ದಿಕ್ಕುಗಳಿಗೆ ಕಳುಹಿಸಿ ಭೂಮಿಯ ಕಟ್ಟಕಡೆಯಿಂದ ಆಕಾಶದ ಕಟ್ಟಕಡೆಯವರೆಗೆ ತಾನು ಆರಿಸಿಕೊಂಡವರನ್ನು ಒಟ್ಟುಗೂಡಿಸುವನು.”

ಅಂಜೂರ ಮರದಿಂದ ಪಾಠ

(ಮತ್ತಾಯ 24:32-35; ಲೂಕ 21:29-33)

²⁸”ಅಂಜೂರದ ಮರದಿಂದ ಒಂದು ಪಾಠವನ್ನು ಕಲಿತುಕೊಳ್ಳಿರಿ; ಅದರ ಎಳೆರಂಬೆಗಳಲ್ಲಿ ಎಲೆಗಳು ಚಿಗುರುವಾಗ ಬೇಸಿಗೆಯು ಹತ್ತಿರವಾಯಿತೆಂದು ನೀವುಅರಿತುಕೊಳ್ಳುತ್ತೀರಿ; ²⁹ಅದೇ ಪ್ರಕಾರ ಇವುಗಳು ಸಂಭವಿಸುವುದನ್ನು ಕಂಡಾಗ  ಹೊಸ್ತಿಲಲ್ಲೇ ಇದ್ದಾನೆಂದು ತಿಳಿದುಕೊಳ್ಳಿರಿ. ³⁰ಇವೆಲ್ಲವುಗಳು ನೆರವೇರುವವರೆಗೆ ಈ ಸಂತತಿಯುಅಳಿದು ಹೋಗುವುದೇ ಇಲ್ಲ ಎಂದು ನಾನು ನಿಮಗೆ ನಿಶ್ಚಯವಾಗಿ ಹೇಳುತ್ತೇನೆ. ³¹ಆಕಾಶವೂ ಭೂಮಿಯೂ ಅಳಿದು ಹೋಗುವವು; ಆದರೆ ನನ್ನ ಮಾತುಗಳು ಅಳಿದು ಹೋಗುವುದೇಇಲ್ಲ.”

ಅನಿರೀಕ್ಷಿತ ಆಗಮನಕ್ಕೆ ಅಣಿಯಾಗಿರಿ

(ಮತ್ತಾಯ 24:36-44)

^{32 “}ಆ ದಿನವಾಗಲಿ, ಆ ಗಳಿಗೆಯಾಗಲಿ ಯಾವಾಗ ಬರುವುದೆಂದು ಪಿತನ ಹೊರತು ಮತ್ತಾರೂ ಅರಿಯರು. ಸ್ವರ್ಗದಲ್ಲಿರುವ ದೂತರೇ ಆಗಲಿ, ಪುತ್ರನೇ ಆಗಲಿ ಅದನ್ನು ಅರಿಯರು. ³³ಆ ಕಾಲ ಯಾವಾಗ ಬರುವುದೆಂದು ನಿಮಗೆ ತಿಳಿಯದೆ ಇರುವ ಕಾರಣ ಎಚ್ಚರಿಕೆಯಿಂದಿರಿ, ಜಾಗರೂಕರಾಗಿರಿ, ³⁴ಯಜಮಾನನೊಬ್ಬನು ದೂರದ ಪ್ರಯಾಣವನ್ನುಕೈಗೊಂಡು ತನ್ನ ಮನೆಯನ್ನು ಬಿಟ್ಟು ಹೋಗುವಾಗ  ತನ್ನ ಸೇವಕರಲ್ಲಿ ಪ್ರತಿಯೊಬ್ಬನಿಗೂ ಅವರವರಿಗೆ ತಕ್ಕ ಜವಾಬ್ದಾರಿಯನ್ನು ವಹಿಸಿ ಕೊಟ್ಟು, ಬಾಗಿಲು ಕಾಯುವವನಿಗೆಜಾಗರೂಕನಾಗಿ ನೋಡಿಕೊಳ್ಳಬೇಕೆಂದು ಆಜ್ಞಾಪಿಸುವ ರೀತಿಯಲ್ಲಿ ನಾನು ನಿಮಗೆ ಹೇಳುತ್ತಿದ್ದೇನೆ. ಎಚ್ಚರವಾಗಿರಿ; ³⁵ಮನೆಯ ಯಜಮಾನನು ಸಂಜೆಯಲ್ಲೋ,ಸರಿಹೊತ್ತಿನಲ್ಲೋ, ಕೋಳಿ ಕೂಗುವಾಗಲೋ, ಬೆಳಕು ಹರಿಯುವಾಗಲೋ ಯಾವಾಗ ಬರುವನೆಂದು ನಿಮಗೆ ತಿಳಿಯದು. ³⁶ಅನಿರೀಕ್ಷಿತವಾಗಿ ಆತನು ಬಂದು ನೀವುನಿದ್ರಿಸುವುದನ್ನು ಕಾಣಬಹುದು. ³⁷ನಿಮಗೆ ಹೇಳುವುದನ್ನೇ ನಾನು ಎಲ್ಲರಿಗೂ ಹೇಳುತ್ತೇನೆ; ಎಚ್ಚರವಾಗಿರಿ,”  ಎಂದರು.

                                                                                                                                                                                                                                                               

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ