ಅಧ್ಯಾಯ 12

ಮಾರ್ಕನು ಬರೆದ ಸುಸಂದೇಶಗಳು

ಗೇಣಿದಾರರ ಕೃತಘ್ನತೆ

(ಮತ್ತಾಯ 21:33-46; ಲೂಕ 20:9-19)

 ¹ಇದಾದ ಬಳಿಕ ಯೇಸುವು ಸಾಮತಿಗಳ ರೂಪದಲ್ಲಿ ಮಾತನಾಡಲು ಪ್ರಾರಂಭಿಸಿದರು:

“ಒಬ್ಬನು ಒಂದು ದ್ರಾಕ್ಷಿಯ ತೋಟವನ್ನು ಮಾಡಿ ಸುತ್ತಲೂ ಬೇಲಿಯನ್ನು ಹಾಕಿಸಿದ್ರಾಕ್ಷಿಯ ರಸವನ್ನು ತೆಗೆಯಲು ಅಲೆಯನ್ನು ಮಾಡಿ ಕಾವಲುಗೋಪುರವನ್ನು ಕಟ್ಟಿಸಿ ಅದನ್ನು ಗೇಣಿದಾರರಿಗೆ ವಹಿಸಿ ಹೊರದೇಶಕ್ಕೆ ಹೊರಟುಹೋದನು. ²ಫಲವನ್ನು ಕೊಡುವಕಾಲವು ಬಂದಾಗ ಅವನು ದ್ರಾಕ್ಷಿತೋಟದ ಫಲದ ಪಾಲನ್ನು ಪಡೆಯುವುದಕ್ಕಾಗಿ ಗೇಣಿದಾರರ ಬಳಿಗೆ ಒಬ್ಬ ಸೇವಕನನ್ನು ಕಳುಹಿಸಿದನು. ³ಅವರು ಅವನನ್ನು ಹಿಡಿದು ಹೊಡೆದುಬರಿಗೈಯಲ್ಲಿ ಕಳುಹಿಸಿ ಬಿಟ್ಟರು. ⁴ಪುನಃ ಯಜಮಾನನು ಮತ್ತೊಬ್ಬ ಸೇವಕನನ್ನು ಅವರ ಬಳಿಗೆ ಕಳುಹಿಸಿದಾಗ ಅವರು ಅವನ ತಲೆಯ ಮೇಲೆ ಕಲ್ಲುಗಳನ್ನು ಎಸೆದು ಗಾಯಪಡಿಸಿಅಪಮಾನಮಾಡಿ ಕಳುಹಿಸಿಬಿಟ್ಟರು. ⁵ಅವನು ಇನ್ನೂ ಅನೇಕರನ್ನು ಕಳುಹಿಸಿದನು. ಗೇಣಿದಾರರು ಅವರಲ್ಲಿ ಕೆಲವರನ್ನು ಹೊಡೆದರು; ಕೆಲವರನ್ನು ಕೊಂದು ಹಾಕಿದರು. ⁶ಕಡೆಯದಾಗಿಅಲ್ಲಿಗೆ ಕಳುಹಿಸಲು ಉಳಿದದ್ದು ಯಜಮಾನನ ಅತಿ ಪ್ರಿಯನಾಗಿದ್ದ ಒಬ್ಬನೇ ಮಗನು; ಅವರು ತಮ್ಮ ಮಗನಿಗೆ ಗೌರವ ಸಲ್ಲಿಸುವರು ಎಂದು ಭಾವಿಸಿದ ಯಜಮಾನನು ಅವನನ್ನು ಸಹಅವರ ಬಳಿಗೆ ಕಳುಹಿಸಿದನು. ⁷ಆದರೆ ಆ ಗೇಣಿದಾರರು, “ಇವನೇ ಈ ತೋಟದ ಉತ್ತರಾಧಿಕಾರಿ; ಬನ್ನಿ, ಇವನನ್ನು ಕೊಂದುಹಾಕೋಣ; ಆಗ ತೋಟವು ನಮ್ಮದಾಗುವುದು,” ಎಂದು ತಮ್ಮತಮ್ಮಲ್ಲಿಯೇ ಮಾತನಾಡಿಕೊಂಡು, ⁸ಅವನನ್ನು ಹಿಡಿದು ಕೊಂದು ಹಾಕಿ ದ್ರಾಕ್ಷಿಯ ತೋಟದ ಹೊರಕ್ಕೆ ಬಿಸಾಡಿದರು. ⁹ಪರಿಸ್ಥಿತಿಯು ಹೀಗಿರುವಾಗ ದ್ರಾಕ್ಷಿಯ ತೋಟದ ಯಜಮಾನನು ಏನು ಮಾಡಬಹುದು? ಅವನು ಬಂದು ಆ ಗೇಣಿದಾರರನ್ನು ಸಂಹರಿಸಿ ದ್ರಾಕ್ಷಿಯ ತೋಟವನ್ನು ಬೇರೆಯವರಿಗೆ ವಹಿಸಿಕೊಡುವನು.

ಧರ್ಮಶಾಸ್ತ್ರದಲ್ಲಿ;

¹⁰‘ಮನೆಯನ್ನು ಕಟ್ಟುವವರು ತಿರಸ್ಕರಿಸಿಹ ಕಲ್ಲು

ಅದು ಆಯಿತು ಪ್ರಮುಖ ಮೂಲೆಗಲ್ಲು.

¹¹ಸರ್ವೇಶ್ವರನಿಂದಲೆ ಆದ ಈ ಕಾರ್ಯವು,

ಮೂಡಿಸಿಹುದು ಆಶ್ಚರ್ಯವೆಮ್ಮ ಕಂಗಳಿಗೆ,'

ಎಂಬ ಈ ಬರಹವನ್ನು ನೀವು ಓದಲಿಲ್ಲವೇ?"

ಎಂದರು.

¹²ಆಗ ಫರಿಸಾಯರು, ಆತನು ತಮ್ಮ ಕುರಿತಾಗಿಯೇ ಈ ಸಾಮತಿಯನ್ನು ಹೇಳಿದರೆಂದು ಅರ್ಥಮಾಡಿಕೊಂಡು ಯೇಸುವನ್ನು ಹಿಡಿದು ಬಂಧಿಸುವ ಸಂದರ್ಭಕ್ಕಾಗಿ ಕಾದರು. ಆದರೆ ಅಲ್ಲಿ ಸೇರಿದ್ದ ಜನರಿಗೆ ಹೆದರಿ ಯೇಸುವನ್ನು ಬಿಟ್ಟು ಹೋದರು.

ಮಾತಿನಲ್ಲಿ ಸಿಲುಕಿಸುವ ಪ್ರಯತ್ನ

(ಮತ್ತಾಯ 22:15-22; ಲೂಕ 20:20-26)

¹³ಅನಂತರ ಅವರು ಯೇಸುವನ್ನು ಮಾತಿನಲ್ಲಿ ಸಿಲುಕಿಸಿ ಹಿಡಿಯಬೇಕೆಂದು ನಿರ್ಧರಿಸಿ ಕೆಲವು ಫರಿಸಾಯರನ್ನೂ ಹಾಗೂ ಹೆರೋದನ ಕಡೆಯವರನ್ನು ಯೇಸುವಿನ ಬಳಿಗೆ ಕಳುಹಿಸಿದರು. ¹⁴ಅವರು ಬಂದು ಯೇಸುವಿಗೆ;

"ಬೋಧಕರೇ, ನೀವು ಸತ್ಯವಂತರೂ, ಯಾರನ್ನೂ ಲಕ್ಷಿಸದವರೂ ಆಗಿದ್ದೀರಿ. ಮನುಷ್ಯರ ಮುಖದಾಕ್ಷಿಣ್ಯ ಮಾಡದೆ ದೇವರಮಾರ್ಗವನ್ನು ಸತ್ಯಕ್ಕೆಅನುಸಾರವಾಗಿ ಬೋಧಿಸುತ್ತಾ ಇರುವಿರಿ ಎಂಬುದು ನಮಗೆ ತಿಳಿದಿದೆ; ಹೀಗಿರುವಾಗ ರೋಮ್‌ ಚಕ್ರಾಧಿಪತಿಯಾದ ಸೆಜಾರನಿಗೆ ತೆರಿಗೆಯನ್ನು ಕಟ್ಟುವುದು ಧರ್ಮಸಮ್ಮತ ಹೌದೋ ಅಲ್ಲವೋ? ¹⁵ನಾವು ಅದನ್ನು ಕೊಡಬೇಕೋ ಬೇಡವೋ?"

ಎಂದು ಕೇಳಿದರು. ಅವರ ಅಂತರಾಳದಲ್ಲಿ ಏನಿದೆಯೆಂಬುದನ್ನು ಅರಿತ ಯೇಸುವು ಅವರಿಗೆ,

"ನೀವು ನನ್ನನ್ನು ಪರೀಕ್ಷಿಸುವುದೇಕೆ? ಒಂದು ನಾಣ್ಯವನ್ನು ತಂದು ನನಗೆ ತೋರಿಸಿರಿ,"

ಎಂದು ಹೇಳಿದರು. ¹⁶ಅವರು ಅದನ್ನು ತಂದು ಯೇಸುವಿಗೆ ಕೊಟ್ಟಾಗ ಯೇಸುವು ಅವರಿಗೆ,

"ಇದರ ಮೇಲಿರುವುದು ಯಾರ ಮುದ್ರೆ? ಇಲ್ಲಿರುವ ಲಿಪಿ ಯಾರದ್ದು?”

ಎಂದು ಪ್ರಶ್ನಿಸಿದಾಗ, ಅವರು ಯೇಸುವಿಗೆ,

"ಅದು ಸೆಜಾರನದು,"

ಎಂದು ಉತ್ತರ ಕೊಟ್ಟರು. ¹⁷ಆಗ ಯೇಸು ಅವರಿಗೆ ಪ್ರತ್ಯುತ್ತರವಾಗಿ,

"ಸೆಜಾರನಿಗೆ ಕೊಡಬೇಕಾದುದನ್ನು ಸೆಜಾರನಿಗೂ ದೇವರಿಗೆ ಕೊಡಬೇಕಾದುದನ್ನು ದೇವರಿಗೂ ಕೊಡಿರಿ,"

ಎಂದು ಹೇಳಿದರು. ಇದನ್ನು ಕೇಳಿದ ಅವರುಯೇಸುವಿನ ಬಗ್ಗೆ ಆತ್ಯಾಶ್ಚರ್ಯಪಟ್ಟರು.

ಏಳು ಜನ ಸಹೋದರರಲ್ಲಿ ಆಕೆ ಯಾರ ಪತ್ನಿ?

(ಮತ್ತಾಯ 22:23-33; ಲೂಕ 20:27-40)

¹⁸ತರುವಾಯ ಸತ್ತನಂತರ ಪುನರುತ್ಥಾನವಿಲ್ಲವೆಂದು ನಂಬುವ ಸದ್ದುಕಾಯರು ಯೇಸುವಿನ ಬಳಿಗೆ ಬಂದು ಅವರನ್ನು,

¹⁹"ಬೋಧಕರೇ, ‘ಒಬ್ಬನು ತನಗೆ ಮಕ್ಕಳಿಲ್ಲದೆಸತ್ತರೆ ಅವನ ತಮ್ಮನು ಅಣ್ಣನ ಹೆಂಡತಿಯನ್ನು ಮದುವೆಯಾಗಿ ತನ್ನ ಅಣ್ಣನಿಗಾಗಿ ಸಂತಾನವನ್ನು ಪಡೆಯಬೇಕು’ ಎಂದು ಮೋಶೆಯು ನಮಗಾಗಿ ಬರೆದಿದ್ದಾನಲ್ಲವೇ? ²⁰ಒಮ್ಮೆ ಏಳುಮಂದಿ ಸಹೋದರರಿದ್ದರು; ಮೊದಲನೆಯವನು ಮದುವೆಯಾಗಿ ಸಂತಾನವಿಲ್ಲದೆ ಸತ್ತಾಗ, ²¹ಎರಡನೆಯವನು ಆಕೆಯನ್ನು ಮದುವೆಯಾದನು. ಆದರೆ ಅವನೂ ಸಂತಾನವಿಲ್ಲದೆಸತ್ತನು; ಅದರಂತೆಯೇ ಮೂರನೆಯವನೂ ಮದುವೆಯಾಗಿ ಸತ್ತನು; ²²ಹೀಗೆ ಏಳು ಮಂದಿಯೂ ಆಕೆಯನ್ನು ಮದುವೆಯಾಗಿ ಸಂತಾನವಿಲ್ಲದೆ ಸತ್ತರು; ಕೊನೆಗೆ ಆ ಸ್ತ್ರೀಯೂ ಸಹ ಸತ್ತಳು. ²³ಪುನರುತ್ಥಾನರಾಗಿ ಅವರು ಎದ್ದಾಗ ಆ ಏಳು ಮಂದಿಗೂ ಆಕೆಯು ಹೆಂಡತಿಯಾಗಿದ್ದ ಕಾರಣಕ್ಕೆ ಈಗ ಆಕೆ ಅವರಲ್ಲಿ ಯಾರ ಹೆಂಡತಿಯಾಗುವಳು?"

ಎಂದು ಪ್ರಶ್ನಿಸಿದರು. ²⁴ಅದಕ್ಕೆ ಯೇಸು,

"ನೀವು ದೈವಶಾಸ್ತ್ರವನ್ನೂ, ದೇವರ ಶಕ್ತಿಯನ್ನೂ ತಪ್ಪಾಗಿ ಅರ್ಥಮಾಡಿಕೊಂಡಿರುವಿರಿ. ಸತ್ತವರು ಪುನರುತ್ಥಾನರಾದ ಬಳಿಕ ಮದುವೆ ಮಾಡಿಕೊಳ್ಳುವುದೂ ಇಲ್ಲ, ಮಾಡಿಕೊಡುವುದೂ ಇಲ್ಲ. ಅವರು ಸ್ವರ್ಗದ ದೇವದೂತರಂತೆ ಇರುತ್ತಾರೆ. ²⁶ಅಲ್ಲದೆ ಸತ್ತವರು ಪುನರುತ್ತಾನರಾಗು ವಿಷಯವಾಗಿ ಹೇಳುವುದಾದರೆ, 'ನಾನು ಅಬ್ರಹಾಮನಿಗೆದೇವರು, ಇಸಾಕನಿಗೆ ದೇವರು, ಯಕೋಬನಿಗೆ ದೇವರು’ ಎಂದು ದೇವರು ಮೋಶೆಗೆ ಹೇಳಿದ್ದನ್ನು ಮೋಶೆಯ ಗ್ರಂಥದಲ್ಲಿ ‘ಉರಿಯುವ ಪೊದೆ’ಯ ಬಗ್ಗೆ ಹೇಳಲಾಗಿರುವ ಭಾಗದಲ್ಲಿ ನೀವು ಓದಲಿಲ್ಲವೇ? ²⁷ದೇವರು ಜೀವಂತರ ದೇವರೇ ಹೊರತು ಸತ್ತವರ ದೇವರಲ್ಲ. ನೀವು ಈ ವಿಷಯವನ್ನು ತಪ್ಪಾಗಿ ಅರ್ಥಮಾಡಿಕೊಂಡಿರುವಿರಿ”

ಎಂದರು.

ದೇವರ ಪ್ರಧಾನ ಆಜ್ಞೆ ಯಾವುದು?

(ಮತ್ತಾಯ 22:34-40; ಲೂಕ 10:25-28)

²⁸ಆಗ ಧರ್ಮಶಾಸ್ತ್ರಿಗಳಲ್ಲಿ ಓರ್ವನು ಬಂದು ಸದ್ದುಕಾಯರು ಯೇಸುವಿನೊಂದಿಗೆ ಸೇರಿ ತರ್ಕಿಸುತ್ತಿರುವುದನ್ನೂ, ಯೇಸುವು ಅವರಿಗೆ ಸರಿಯಾದ ಉತ್ತರವನ್ನುಕೊಟ್ಟಿರುವರೆಂಬುದನ್ನೂ ತಿಳಿದು, ಯೇಸುವಿಗೆ,

"ಎಲ್ಲಾ ದೈವಾಜ್ಞೆಗಳಲ್ಲಿ ಮೊದಲನೆಯದು ಯಾವುದು?"

ಎಂದು ಪ್ರಶ್ನಿಸಿದನು. ²⁹ಯೇಸು ಪ್ರತ್ಯುತ್ತರವಾಗಿ ಅವನಿಗೆ,

"ಎಲ್ಲಾದೈವಾಜ್ಞೆಗಳಲ್ಲಿಯೂ ಮೊದಲನೆಯದು, ‘ಇಸ್ರಾಯೇಲ್‌ ಜನಾಂಗವೇ ಕೇಳು; ನಮ್ಮ ದೇವರಾದ ಸರ್ವೇಶ್ವರರೇ ಏಕೈಕ ದೇವರಾಗಿದ್ದಾರೆ; ³⁰ನೀನು ನಿನ್ನ ದೇವರಾದಸರ್ವೇಶ್ವರರನ್ನು ಪೂರ್ಣಹೃದಯದಿಂದಲೂ, ಪೂರ್ಣಆತ್ಮದಿಂದಲೂ, ಪೂರ್ಣಮನಸ್ಸಿನಿಂದಲೂ, ಪೂರ್ಣಶಕ್ತಿಯಿಂದಲೂ ಪ್ರೀತಿಸು; ಇದೆ ಮೊದಲನೆಯ ದೈವಾಜ್ಞೆ. ³¹ಅದರಂತೆಯೇ, ‘ನೀನು ನಿನ್ನ ನೆರೆಯವನನ್ನು ನಿನ್ನನ್ನು ನೀನು ಪ್ರೀತಿಸುವಂತೆಯೇ ಪ್ರೀತಿಸಬೇಕು’ ಎಂಬುದು ಎರಡನೆಯ ಆಜ್ಞೆಯಾಗಿದೆ. ಇವುಗಳಿಗಿಂತ ಶ್ರೇಷ್ಟ ದೈವಾಜ್ಞೆಯು ಮತ್ತೊಂದಿಲ್ಲ,"

ಎಂದು ಹೇಳಿದರು. ³²ಅದಕ್ಕೆ ಧರ್ಮಶಾಸ್ತ್ರಿಯು ಯೇಸುವಿಗೆ,

"ಬೋಧಕರೇ, ನೀವು ಸತ್ಯವನ್ನೇ ಹೇಳಿರುವಿರಿ; ಏಕೆಂದರೆ ದೇವರು ಒಬ್ಬರೇ; ಅವರ ಹೊರತು ಬೇರೊಬ್ಬರು ಇಲ್ಲವೇಇಲ್ಲ. ³³ಅವರನ್ನು ಪೂರ್ಣ ಹೃದಯದಿಂದಲೂ, ಪೂರ್ಣಮನಸ್ಸಿನಿಂದಲೂ, ಪೂರ್ಣಆತ್ಮದಿಂದಲೂ, ಪೂರ್ಣಶಕ್ತಿಯಿಂದಲೂ ಪ್ರೀತಿಸಬೇಕು. ಅಂತೆಯೇ ತನ್ನ ನೆರೆಯವನನ್ನು ತನ್ನನ್ನುಪ್ರೀತಿಸುವಂತೆಯೇ ಪ್ರೀತಿಸುವುದು ಸಕಲ ದಹನ ಬಲಿಗಳಿಗಿಂತಲೂ, ಯಜ್ಞಗಳಿಗಿಂತಲೂ ಶ್ರೇಷ್ಟವಾದುದಾಗಿದೆ,"

ಎಂದನು. ³⁴ಅವನು ಜಾಣತನದಿಂದ ಉತ್ತರಕೊಟ್ಟಿದ್ದನ್ನು ಕಂಡು ಯೇಸು ಅವನಿಗೆ,

"ನೀನು ದೇವರಸಾಮ್ರಾಜ್ಯಕ್ಕೆ ದೂರವಾದವನಲ್ಲ,"

ಎಂದರು. ಅಂದಿನಿಂದ ಯೇಸುವನ್ನು ಪ್ರಶ್ನಿಸುವುದಕ್ಕೆ ಯಾರಿಗೂ ಧೈರ್ಯವಾಗಲಿಲ್ಲ.

ಯೇಸು ದಾವೀದನ ಪುತ್ರನೋ, ಪ್ರಭುವೋ?

(ಮತ್ತಾಯ 22:412-46; ಲೂಕ 20:41-44)

 ³⁵ ಬಳಿಕ ಯೇಸುವು ದೇವಾಲಯದಲ್ಲಿ ಬೋಧಿಸುತ್ತಾ,

"ಅಭಿಷಿಕ್ತ ಲೋಕೋದ್ಧಾರಕನನ್ನು 'ದಾವೀದನ ಕುಮಾರ' ಎಂದು ಧರ್ಮಶಾಸ್ತ್ರಿಗಳು ಕರೆಯುವರಲ್ಲ ಇದು ಹೇಗೆಸಾಧ್ಯ?

³⁶ 'ನಿನ್ನ ವಿರೋಧಿಗಳನ್ನು ನಾನಿನ್ನ

ಪಾದಪೀಠವನ್ನಾಗಿ ಮಾಡುವತನಕ

ನೀನೆನ್ನ ಬಲಗಡೆ ಆಸೀನನಾಗಿರು

ಎಂದು ಹೇಳಿಹರೆನ್ನ ಪ್ರಭುವಿಗೆ ಸರ್ವೇಶ್ವರನು'

ಎಂದು ದಾವೀದನೇ ಪವಿತ್ರಾತ್ಮಭರಿತನಾಗಿ ನುಡಿದಿದ್ದಾನೆ. ³⁷ದಾವೀದನು ಸ್ವಯಂ ಯೇಸುವನ್ನು ಪ್ರಭುವೆಂದು ಕರೆದಿರುವಾಗ ಅವರು ಆತನ ಮಗನಾಗುವುದು ಹೇಗೆ?"

ಎಂದು ಕೇಳಿದರು.

ಕಪಟ ಶಾಸ್ತ್ರಜ್ಞರ ಬಗ್ಗೆ ಎಚ್ಚರಿಕೆ!

(ಮತ್ತಾಯ 23:1-36; ಲೂಕ 20:45-47)

ಜನಸಮೂಹವು ಯೇಸುವಿನ ಮಾತುಗಳನ್ನು ಸಂತೋಷದಿಂದ ಆಲಿಸುತ್ತಿತ್ತು. ³⁸ಯೇಸುವು ಅವರಿಗೆ ಬೋಧಿಸುತ್ತಾ,

"ಉದ್ದವಾದ ಅಂಗಿಯನ್ನು ತೊಟ್ಟು ಪೇಟೆಯಬೀದಿಗಳಲ್ಲಿ ನಿಂತು ವಂದನೆಗಳನ್ನೂ, ³⁹ಸಭಾಮಂದಿರಗಳಲ್ಲಿ ಮುಖ್ಯಪೀಠಗಳನ್ನೂ, ಔತಣಕೂಟಗಳಲ್ಲಿ ಶ್ರೇಷ್ಟವಾದ ಸ್ಥಾನಗಳನ್ನೂ ಅಪೇಕ್ಷಿಸುವ ಧರ್ಮಶಾಸ್ತ್ರಿಗಳ ವಿಷಯವಾಗಿಎಚ್ಚರಿಕೆ; ⁴⁰ಇವರು ವಿಧವೆಯರ ಮನೆಗಳನ್ನು ನುಂಗಿ, ನಟನೆಗಾಗಿ ಉದ್ದುದ್ದ ಪ್ರಾರ್ಥನೆಗಳನ್ನು ಮಾಡುತ್ತಾರೆ; ಇಂಥವರು ದೇವರಿಂದ ಹೆಚ್ಚಿನ ದಂಡನೆಯನ್ನು ಹೊಂದುವರು,"

ಎಂದರು.

ಬಡವಿಧವೆಯು ನೀಡಿದ ಉದಾರ ಕಾಣಿಕೆ

(ಲೂಕ 21:1-4)

⁴¹ಯೇಸು ದೇವಾಲಯದ ಕಾಣಿಕೆ ಪೆಟ್ಟಿಗೆಗಳಿಗೆ ಎದುರಾಗಿ ಕುಳಿಕೊಂಡು ಜನರು ಅದರಲ್ಲಿ ಕಾಣಿಕೆಯ ಹಣವನ್ನು ಹಾಕುತ್ತಿರುವುದನ್ನು ನೋಡುತ್ತಿದ್ದರು; ಅನೇಕ ಐಶ್ವರ್ಯವಂತರು ಹೆಚ್ಚುಹೆಚ್ಚಾಗಿ ಹಣವನ್ನು ಹಾಕಿತ್ತಿದ್ದರು. ⁴²ಅಷ್ಟರಲ್ಲಿ ಅಲ್ಲಿಗೆ ಒಬ್ಬ ಬಡ ವಿಧವೆಯು ಬಂದು ತಾಮ್ರದ ಎರಡು ಚಿಕ್ಕ ನಾಣ್ಯಗಳನ್ನು ಪೆಟ್ಟಿಗೆಯಲ್ಲಿ ಹಾಕಿದಳು. ⁴³ಆಗ ಯೇಸುವು ತಮ್ಮ ಶಿಷ್ಯರನ್ನು ಹತ್ತಿರಕ್ಕೆ ಕರೆದು ಅವರಿಗೆ,

"ಈ ಪೆಟ್ಟಿಗೆಯಲ್ಲಿ ಹಣವನ್ನು ಹಾಕಿದವರೆಲ್ಲರಿಗಿಂತ ಈ ಬಡ ವಿಧವೆಯು ಹೆಚ್ಚಾಗಿ ಹಾಕಿದ್ದಾಳೆ”

ಎಂದು ನಾನು ನಿಮಗೆ ನಿಜವಾಗಿ ಹೇಳುತ್ತೇನೆ. ⁴⁴ಉಳಿದವರು ತಮ್ಮ ಅಪರಿಮಿತವಾದ ಐಶ್ವರ್ಯದಲ್ಲಿ ಕಾಣಿಕೆಯನ್ನು ಹಾಕಿದರು; ಆದರೆ ಈಕೆಯು ತನ್ನ ಬಡತನದಲ್ಲೂ ತನ್ನಲ್ಲಿದ್ದುದನ್ನೆಲ್ಲಾ ಅರ್ಪಿಸಿದಳು. ಆಕೆಯು ತನ್ನ ಜೀವನಾಧಾರವನ್ನೇ ದಾನಮಾಡಿದ್ದಾಳೆ," ಎಂದರು.

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ