ಅಧ್ಯಾಯ 11

ಮಾರ್ಕನು ಬರೆದ ಸುಸಂದೇಶಗಳು

ಅರಸರಂತೆ ಜೆರುಸಲೇಂಗೆ ಯೇಸುವಿನ ಪ್ರವೇಶ

(ಮತ್ತಾಯ 21:1-9; ಲೂಕ 19:29-38; ಯೊವಾನ್ನ 12:12-16)

¹ಅವರು ಜೆರುಸಲೇಮಿಗೆ ಸಮೀಪವಾಗಿ ಓಲಿವ್‌ಮರಗಳ ಗುಡ್ಡದ ಬಳಿ ಇರುವ ಬೇತ್ಫಗೆಗೂ, ಬೇಥಾನಿಗೂ ಬಂದ ನಂತರ ತಮ್ಮ ಶಿಷ್ಯರಲ್ಲಿ ಇಬ್ಬರನ್ನು ಕರೆದು ಅವರಿಗೆ,

²"ನಿಮ್ಮ ಎದುರಿಗಿರುವ ಹಳ್ಳಿಗೆ ಹೋಗಿರಿ; ನೀವು ಅದರೊಳಕ್ಕೆ ಪ್ರವೇಶಿಸುತ್ತಲೇ ಅಲ್ಲಿ ಯಾರು ಎಂದಿಗೂ ಕುಳಿತುಕೊಳ್ಳದ ಒಂದು ಕತ್ತೆಮರಿಯನ್ನು ಕಾಣುವಿರಿ; ಅದನ್ನು ಬಿಚ್ಚಿ ತನ್ನಿರಿ. ³ಯಾರಾದರೂ ನಿಮಗೆ, 'ನೀವೇಕೆ ಇದನ್ನು ತೆಗದುಕೊಂಡು ಹೋಗುತ್ತಿರುವಿರಿ?' ಎಂದು ಕೇಳಿದರೆ, 'ಇದು ಪ್ರಭುವಿಗೆ ಬೇಕಾಗಿದೆ,' ಎಂದು ಹೇಳಿರಿ; ಆಗ ಕೂಡಲೆ ಅವರು ನಿಮ್ಮನ್ನು ಅದರೊಂದಿಗೆ ಕಳುಹಿಸಿಬಿಡುವರು,"

ಎಂದು ಹೇಳಿದರು. ⁴ಆಗ ಅವರು ಹೊರಟು ಹೋಗಿ ಎರಡು ದಾರಿಗಳು ಸೇರುವ ಸ್ಥಳದಲ್ಲಿನ ಮನೆಯ ಹೊರಗೆ ಬಾಗಿಲಿನ ಬಳಿಯಲ್ಲಿ ಕಟ್ಟಿದ್ದ ಕತ್ತೆಮರಿಯನ್ನು ಬಿಚ್ಚುತ್ತಿರುವಾಗ ⁵ಅಲ್ಲಿ ನಿಂತವರಲ್ಲಿ ಕೆಲವರು ಅವರಿಗೆ,

"ಆ ಕತ್ತೆಮರಿಯನ್ನು ಏನು ಮಾಡುತ್ತಿರುವಿರಿ?"

ಎಂದು ಕೇಳಿದರು. ⁶ಅದಕ್ಕೆ ಅವರು ಯೇಸುವು ಹೇಳಿಕೊಟ್ಟಂತೆಯೇ ಹೇಳಿದರು. ಆಗ ಅಲ್ಲಿದ್ದವರು ಅವರಿಗೆ ಹೋಗಲು ಬಿಟ್ಟರು. ⁷ಅವರು ಕತ್ತೆಮರಿಯನ್ನು ಯೇಸುವಿನ ಬಳಿಗೆ ತಂದು ಅದರ ಮೇಲೆ ತಮ್ಮ ವಸ್ತ್ರಗಳನ್ನು ಹಾಕಿದಾಗ ಯೇಸುವು ಅದರ ಮೇಲೆ ಕುಳಿತುಕೊಂಡರು. ⁸ಆಗ ಅನೇಕರು ತಮ್ಮ ವಸ್ತ್ರಗಳನ್ನು ದಾರಿಯಲ್ಲಿ ಹಾಸಿದರು; ಇತರರು ಮರಗಳಿಂದ ಚಿಗುರೆಲೆಯ ಕೊಂಬೆಗಳನ್ನು ಕಡಿದು ದಾರಿಯಲ್ಲಿ ಹಾಕಿದರು. ⁹ಆಗ ಯೇಸುವಿನ ಮುಂದೆಯೂ ಹಿಂದೆಯೂ ಹೋಗುತ್ತಿದ್ದವರು ಕೂಗುತ್ತಾ,

"ಹೊಸಾನ್ನ; ಪ್ರಭುವಿನ ಹೆಸರಿನಲ್ಲಿ ಬರುವವರು ಧನ್ಯರು; ¹⁰ನಮ್ಮ ಪಿತೃವಾದ ದಾವೀದನ ರಾಜ್ಯವು ಆಶೀರ್ವದಿಸಲ್ಪಡಲಿ; ಉನ್ನತದಲ್ಲಿ ಹೊಸಾನ್ನ,"

ಎಂದು ಹೇಳಿದರು. 

¹¹ಯೇಸು ಜೆರುಸಲೇಮಿಗೆ ಬಂದು ದೇವಾಲಯದೊಳಕ್ಕೆ ಪ್ರವೇಶಿಸಿ ಸುತ್ತಲೂ ಎಲ್ಲವನ್ನು ನೋಡಿ; ಸಂಜೆಯಾಗುತ್ತಲೇ ತಮ್ಮ ಹನ್ನೆರಡು ಮಂದಿ ಶಿಷ್ಯರೊಂದಿಗೆ ಬೇಥಾನಿಗೆ ಹೊರಟುಹೋದರು. 

ಅಂಜೂರದ ಮರವನ್ನು ಯೇಸು ಶಪಿಸಿದ್ದು; ದೇವಾಲಯದ ವ್ಯಾಪಾರಿಗಳನ್ನು ಯೇಸುವು ಅಟ್ಟಿದ್ದು

(ಮತ್ತಾಯ 21:12-22; ಲೂಕ 19:45-48)

¹²ಮರುದಿವಸ ಅವರು ಬೇಥಾನಿಯಿಂದ ಹಿಂದಿರುಗಿ ಬರುತ್ತಿದ್ದಾಗ ಹಸಿದಿದ್ದರು; ¹³ಅವರು ಎಲೆಗಳಿಂದ ತುಂಬಿದ್ದ ಒಂದು ಅಂಜೂರದ ಮರವನ್ನು ದೂರದಿಂದಲೇ ನೋಡಿ ತಮಗೆ ಅದರಲ್ಲಿ ಏನಾದರೂ ಸಿಗಬಹುದೆಂದು ಅಲ್ಲಿಗೆ ಬಂದರು; ಆದರೆ ಅದರ ಬಳಿಗೆ ಬಂದಾಗ ಎಲೆಗಳ ಹೊರತು ಮತ್ತೇನೂ ಅದರಲ್ಲಿ ಕಾಣಲಿಲ್ಲ; ಅದು ಅಂಜೂರದ ಹಣ್ಣಿನ ಕಾಲವಾಗಿರಲಿಲ್ಲ. ¹⁴ಯೇಸು ಆ ಮರಕ್ಕೆ,

"ಇನ್ನೆಂದಿಗೂ ಯಾರೂ ನಿನ್ನಿಂದ ಹಣ್ಣನ್ನು ತಿನ್ನದಿರಲಿ,"

ಎಂದರು. ಯೇಸುವಿನ ಶಿಷ್ಯರು ಅದನ್ನು ಕೇಳಿಸಿಕೊಂಡರು. 

¹⁵ಅವರು ಜೆರುಸಲೇಮಿಗೆ ಬಂದಾಗ ದೇವಾಲಯದೊಳಕ್ಕೆ ಹೋಗಿ ಅಲ್ಲಿ ಮಾರುತ್ತಿದ್ದವರನ್ನೂ, ಕೊಳ್ಳುತ್ತಿದ್ದವರನ್ನೂ ಹೊರಗೆ ಹಾಕಿ, ಹಣ ಬದಲಾಯಿಸುವವರ ಮೇಜುಗಳನ್ನೂ, ಪಾರಿವಾಳಗಳನ್ನು ಮಾರುತ್ತಿದ್ದವರ ಪೀಠಗಳನ್ನೂ ಕೆಡವಿಹಾಕಿದರು. ¹⁶ಯಾರನ್ನೂ ಸಾಮಾನುಗಳನ್ನು ಹೊತ್ತುಕೊಂಡು ದೇವಾಲಯದ ಮಾರ್ಗವಾಗಿ ಹೋಗಲು ಬಿಡಲಿಲ್ಲ. ¹⁷ಯೇಸುವು ಅಲ್ಲಿದ್ದವರಿಗೆ ಉಪದೇಶಿಸುತ್ತಾ,

"ನನ್ನ ಆಲಯವು ಎಲ್ಲಾ ಜನಾಂಗಗಳಿಗೂ ಪ್ರಾರ್ಥನಾಲಯವೆನಿಸಿಕೊಳ್ಳುವುದೆಂದು ಧರ್ಮಶಾಸ್ತ್ರದಲ್ಲಿ ಬರೆದಿದೆಯಲ್ಲವೇ? ಆದರೆ ನೀವು ಅದನ್ನು ಕಳ್ಳರ ಗವಿಯನ್ನಾಗಿ ಮಾಡಿದ್ದೀರಿ,"

ಎಂದು ಹೇಳಿದರು. ¹⁸ಆಗ ಧರ್ಮಶಾಸ್ತ್ರಿಗಳೂ, ಪ್ರಧಾನಯಾಜಕರೂ ಅದನ್ನು ಕೇಳಿ ಯೇಸುವನ್ನು ಹೇಗೆ ಕೊಲ್ಲುವುದೆಂದು ಆಲೋಚಿಸಿದರು. ಆದರೆ ಜನರೆಲ್ಲರೂ ಅವರ ಬೋಧನೆಗೆ ಅತ್ಯಾಶ್ಚರ್ಯಪಟ್ಟಿದ್ದರಿಂದ ಅವರು ಯೇಸುವಿಗೆ ಭಯಪಟ್ಟರು. 

¹⁹ಪ್ರತಿ ಸಂಜೆ ಯೇಸುವೂ ಆತನ ಶಿಷ್ಯರು ಪಟ್ಟಣವನ್ನು ಬಿಟ್ಟು ಹೊರಹೋಗುತ್ತಿದ್ದರು. ²⁰ಬೆಳಿಗ್ಗೆ ಅವರು ದಾರಿಯಲ್ಲಿ ಹೋಗುತ್ತಿದ್ದಾಗ ಆ ಅಂಜೂರದ ಮರವು ಬೇರು ಸಹಿತವಾಗಿ ಒಣಗಿರುವುದನ್ನು ಕಂಡರು. ²¹ಆಗ ಪೇತ್ರನು ಹಿಂದಿನ ದಿನದ ಘಟನೆಯನ್ನು ನೆನಪು ಮಾಡಿಕೊಂಡು ಯೇಸುವಿಗೆ,

"ಗುರುವೇ, ನೀವು ಶಪಿಸಿದಂತೆಯೇ ಅಂಜೂರದ ಮರವು ಒಣಗಿಹೋಗಿದೆ,"

ಎಂದನು. ²²ಯೇಸು ಪ್ರತ್ಯುತ್ತರವಾಗಿ ಅವರಿಗೆ ಹೇಳಿದ್ದೇನೆಂದರೆ,

"ದೇವರಲ್ಲಿ ನಂಬಿಕೆ ಇಡಿರಿ. ²³ನಾನು ನಿಮಗೆ ನಿಜವಾಗಿ ಹೇಳುತ್ತೇನೆ, ಯಾರು ಬೇಕಾದರೂ ಈ ಬೆಟ್ಟವನ್ನು, ಕಿತ್ತುಕೊಂಡು ಹೋಗಿ ಸಮುದ್ರದಲ್ಲಿ ಬೀಳು ಎಂದು ಯಾವ ಸಂಶಯವನ್ನೂ ಪಡದೆ ನಂಬಿಕೆಯಿಂದ ಹೇಳಿದರೆ ಅವನು ಹೇಳಿದಂತೆಯೇ ಆಗುವುದು. ²⁴ಆದ ಕಾರಣ ನಾನು ನಿಮಗೆ ಹೇಳುವುದೇನೆಂದರೆ, ನೀವು ಪ್ರಾರ್ಥಿಸುವಾಗ ಏನೇನನ್ನೂ ಆಶಿಸುತ್ತೀರೋ ಅವು ನಿಮಗೆ ಸಿಗುವವೆಂದು ನಂಬಿರಿ; ಅವುಗಳನ್ನು ನೀವು ಹೊಂದುವಿರಿ. ²⁵ನೀವು ನಿಂತುಕೊಂಡು ಪ್ರಾರ್ಥಿಸುವಾಗ ಯಾರ ಮೇಲಾದರೂ ವಿರೋಧವಿದ್ದರೆ ಅವನನ್ನು ಕ್ಷಮಿಸಿರಿ; ಆಗ ಪರಲೋಕದಲ್ಲಿರುವ ನಿಮ್ಮ ತಂದೆಯೂ ಸಹ ನಿಮ್ಮ ಅಪರಾಧಗಳನ್ನು ಕ್ಷಮಿಸುವರು. ²⁶ನೀವು ಕ್ಷಮಿಸದಿದ್ದರೆ ಪರಲೋಕದಲ್ಲಿರುವ ನಿಮ್ಮ ತಂದೆಯೂ ನಿಮ್ಮ ಅಪರಾಧಗಳನ್ನು ಕ್ಷಮಿಸುವುದಿಲ್ಲ.” 

ಧರ್ಮಶಾಸ್ತ್ರಿಗಳ ಪ್ರಶ್ನೆಗೆ ಯೇಸುವಿನ ಉತ್ತರ

(ಮತ್ತಾಯ 21:23-46; ಲೂಕ 20:1-19)

²⁷ಯೇಸುವು ಪುನಃ ಜೆರುಸಲೇಮಿಗೆ ಬಂದು ದೇವಾಲಯದಲ್ಲಿ ತಿರುಗಾಡುತ್ತಿರುವಾಗ ಪ್ರಧಾನ ಯಾಜಕರೂ, ಧರ್ಮಶಾಸ್ತ್ರಿಗಳೂ, ಪಟ್ಟಣದ ಹಿರಿಯರೂ ಅವರ ಬಳಿಗೆ ಬಂದು,

²⁸"ನೀನು ಯಾವ ಅಧಿಕಾರದಿಂದ ಇವುಗಳನ್ನು ಮಾಡುವೆ? ಇವುಗಳನ್ನು ಮಾಡುವುದಕ್ಕೆ ನಿನಗೆ ಅಧಿಕಾರ ಕೊಟ್ಟವರು ಯಾರು?"

ಎಂದು ಪ್ರಶ್ನಿಸಿದರು. ²⁹ಅದಕ್ಕೆ ಪ್ರತ್ಯುತ್ತರವಾಗಿ ಯೇಸು ಅವರಿಗೆ,

"ನಾನು ಸಹ ಒಂದು ಪ್ರಶ್ನೆಯನ್ನು ನಿಮಗೆ ಕೇಳುತ್ತೇನೆ, ನನಗೆ ಉತ್ತರಕೊಡಿರಿ; ಆಗ ಯಾವ ಅಧಿಕಾರದಿಂದ ನಾನು ಇವುಗಳನ್ನು ಮಾಡುತ್ತಿರುವೆನೆಂದೂ ನಿಮಗೆ ಹೇಳುತ್ತೇನೆ. ³⁰ಯೊವಾನ್ನನಿಗೆ ದೀಕ್ಷಾಸ್ನಾನ ಮಾಡಿಸುವ ಅಧಿಕಾರವು ಪರಲೋಕದಿಂದ ಬಂತೋ ಇಲ್ಲವೆ ಮನುಷ್ಯರಿಂದ ಬಂತೋ, ಉತ್ತರಕೊಡಿರಿ,"

ಎಂದರು. ³¹ಆಗ ಅವರು, ‘ಅಧಿಕಾರವು ಪರಲೋಕದಿಂದ ಬಂತು' ಎಂದು ಹೇಳಿದರೆ, 'ನೀವೇಕೆ ಅವರನ್ನು ನಂಬಲಿಲ್ಲ,' ಎಂದು ಯೇಸುವು ಕೇಳಬಹುದು; ³² ಆದರೆ 'ಮನುಷ್ಯರಿಂದ ಅಧಿಕಾರ ಬಂತು,' ಎಂದು ಹೇಳಿದರೆ ಜನರಿಂದ ತಮಗೇನಾಗುವುದೋ ಎಂದವರು ಯೋಚಿಸಲಾರಂಭಿಸಿದರು; ಏಕೆಂದರೆ ಯೊವಾನ್ನನು ನಿಜವಾಗಿಯೂ ಪ್ರವಾದಿಯೆಂದು ಎಲ್ಲರೂ ನಂಬಿದ್ದರು. ³³ಅವರು ಪ್ರತ್ಯುತ್ತರವಾಗಿ ಯೇಸುವಿಗೆ,

"ನಾವು ಹೇಳಲಾರೆವು,"

ಎಂಬ ಉತ್ತರ ಕೊಟ್ಟರು. ಅದಕ್ಕೆ ಯೇಸುವು,

"ಯಾವ ಅಧಿಕಾರದಿಂದ ಇವುಗಳನ್ನು ಮಾಡುತ್ತೇನೆಂದು ನಾನೂ ಸಹ ನಿಮಗೆ ಹೇಳುವುದಿಲ್ಲ," ಎಂದು ಅವರಿಗೆ ಉತ್ತರ ಕೊಟ್ಟರು.

HOME

ಮತ್ತಾಯನು ಬರೆದ ಸುಸಂದೇಶ

ಲೂಕನು ಬರೆದ ಸುಸಂದೇಶ

ಯೊವಾನ್ನನು ಬರೆದ ಸುಸಂದೇಶ