ಮಾರ್ಕನು ಬರೆದ ಸುಸಂದೇಶ: ಅಧ್ಯಾಯ 10

ಮಾರ್ಕನು ಬರೆದ ಸುಸಂದೇಶಗಳು

ಹೆಂಡತಿಯ ಪರಿತ್ಯಾಗದ ವಿಷಯದಲ್ಲಿ ಯೇಸುವಿನ ಉತ್ತರ

(ಮತ್ತಾಯ 19:1-9; ಲೂಕ 16:18)

¹ಯೇಸುವು ಅಲ್ಲಿಂದ ಎದ್ದು ಜೋರ್ಡನ್‌ ಹೊಳೆಯ ಆಚೆಗಿರುವ ಜುದೇಯ ಪ್ರಾಂತ್ಯಕ್ಕೆ ಬಂದರು; ಜನರು ಪುನಃ ಅವರ ಬಳಿಗೆ ಧಾವಿಸಿ ಬರುತ್ತಿರಲು ವಾಡಿಕೆಯಂತೆ ಯೇಸುವು ಅವರಿಗೆ ಬೋಧಿಸಿದರು. ²ಆಗ ಯೇಸುವಿನ ಬಳಿಗೆ ಬಂದ ಫರಿಸಾಯರು ಅವರನ್ನು ಪರೀಕ್ಷಿಸುವ ಉದ್ದೇಶದಿಂದ,

"ಒಬ್ಬನು ತನ್ನ ಹೆಂಡತಿಯನ್ನು ಬಿಟ್ಟು ಬಿಡುವುದು ಧರ್ಮವೋ ಹೇಗೆ?"

ಎಂದು ಕೇಳಿದರು. ³ಯೇಸುವು ಅವರಿಗೆ ಪ್ರತ್ಯುತ್ತರವಾಗಿ,

"ಮೋಶೆಯು ನಿಮಗೇನು ಆಜ್ಞೆಯನ್ನು ಕೊಟ್ಟಿರುವನು?"

ಎಂದು ಕೇಳಿದರು. ⁴ಅದಕ್ಕೆ ಅವರು,

"ತ್ಯಾಗಪತ್ರವನ್ನು ಬರೆದುಕೊಟ್ಟು ಆಕೆಯನ್ನು ಬಿಟ್ಟು ಬಿಡಬೇಕೆಂದು ಮೋಶೆಯ ಆಜ್ಞೆಯಿದೆ,"

ಎಂದರು. ⁵ಯೇಸು ಅವರಿಗೆ ಪ್ರತ್ಯುತ್ತರವಾಗಿ,

"ಅವನು ನಿಮ್ಮ ಹೃದಯದ ಕಾಠಿಣ್ಯದ ಕಾರಣದಿಂದಾಗಿ ನಿಮಗೆ ಈ ಆಜ್ಞೆಯನ್ನು ಬರೆದಿರುವನು. ⁶ಆದರೆ ಸೃಷ್ಟಿಯ ಪ್ರಾರಂಭದಿಂದಲೇ ದೇವರು ಗಂಡು-ಹೆಣ್ಣನ್ನು ಸೃಷ್ಟಿಸಿರುವನು. ⁷ಈ ಕಾರಣದಿಂದಲೇ ಗಂಡು ತನ್ನ ತಂದೆಯನ್ನೂ, ತಾಯಿಯನ್ನೂ ಬಿಟ್ಟು ತನ್ನ ಹೆಂಡತಿಯನ್ನು ಸೇರಿಕೊಂಡು,⁸ಅವರಿಬ್ಬರು ಒಂದೇ ಶರೀರವಾಗಿರುವರೆಂದು ಬರೆದಿದೆ. ಹೀಗಿರುವಲ್ಲಿ ಅವರಿನ್ನು ಇಬ್ಬರಲ್ಲ, ಒಂದೇ ಶರೀರವಾಗಿದ್ದಾರೆ. ⁹ಆದುದರಿಂದ ದೇವರು ಕೂಡಿಸಿದ್ದನ್ನು ಮನುಷ್ಯನು ಬೇರ್ಪಡಿಸದಿರಲಿ,"

ಎಂದರು. ¹⁰ಯೇಸುವಿನ ಶಿಷ್ಯರು ಮನೆಯಲ್ಲಿ ಅದೇ ವಿಷಯವನ್ನು ಯೇಸುವಿಗೆ ಪುನಃ ಕೇಳಿದಾಗ ¹¹ಅವರು,

"ಯಾರಾದರೂ ತನ್ನ ಹೆಂಡತಿಯನ್ನು ಬಿಟ್ಟು ಇನ್ನೊಬ್ಬಳನ್ನು ಮದುವೆಯಾದರೆ ಅವನು ಅವಳಿಗೆ ವಿರುದ್ಧವಾಗಿ ವ್ಯಭಿಚಾರ ಮಾಡುವವನಾಗುತ್ತಾನೆ. ¹²ಇದಲ್ಲದೆ ಒಬ್ಬ ಸ್ತ್ರೀಯು ತನ್ನ ಗಂಡನನ್ನು ಬಿಟ್ಟು ಬೇರೊಬ್ಬನನ್ನು ಮದುವೆಯಾದರೂ ಅವಳೂ ವ್ಯಭಿಚಾರ ಮಾಡುವವಳಾಗುತ್ತಾಳೆ,"

ಎಂದರು.

ಚಿಕ್ಕಮಕ್ಕಳಿಗೆ ಯೇಸುವಿನ ಆಶೀರ್ವಾದ

(ಮತ್ತಾಯ 19:13-15; ಲೂಕ 18:15-17)

¹³ಬಳಿಕ ಕೆಲವರು ತಮ್ಮ ಚಿಕ್ಕ ಮಕ್ಕಳನ್ನು ಯೇಸುವಿನಿಂದ ಮುಟ್ಟಿಸಬೇಕೆಂದು ಅವರ ಬಳಿಗೆ ತಂದಾಗ ಅವರ ಶಿಷ್ಯರು ತಂದವರನ್ನು ಗದರಿಸಿದರು. ¹⁴ಆದರೆ ಯೇಸು ಅದನ್ನು ಕಂಡು ಕೋಪಗೊಂಡು ಅವರಿಗೆ,

"ಚಿಕ್ಕಮಕ್ಕಳನ್ನು ನನ್ನ ಬಳಿಗೆ ಬರಲು ಬಿಡಿರಿ; ಅವುಗಳಿಗೆ ಅಡ್ಡಿ ಮಾಡಬೇಡಿರಿ; ದೇವರ ರಾಜ್ಯವು ಇಂಥವರದೇ. ¹⁵ನಿಮಗೆ ನಿಜವಾಗಿ ಹೇಳುತ್ತೇನೆ, ಯಾರು ಶಿಶುಭಾವದಿಂದ ದೇವರ ರಾಜ್ಯವನ್ನು ಅಂಗೀಕರಿಸುವುದಿಲ್ಲವೋ ಅವರು ಅದರೊಳಕ್ಕೆ ಪ್ರವೇಶಿಸಲಾರರು”

¹⁶ಎನ್ನುತ್ತಾ ಆ ಮಕ್ಕಳನ್ನು ಅಪ್ಪಿಕೊಂಡು ತಮ್ಮ ಕೈಗಳನ್ನು ಅವುಗಳ ಮೇಲೆ ಇಟ್ಟು ಆಶೀರ್ವದಿಸಿದರು.

ಹಣದ ಭ್ರಮೆಯಿಂದುಂಟಾಗುವ ಕೇಡು

(ಮತ್ತಾಯ 19:16-30; ಲೂಕ 18:18-30)

¹⁷ಯೇಸುವು ಅಲ್ಲಿಂದ ಹೊರಟು ದಾರಿಯಲ್ಲಿ ಸಾಗುತ್ತಿದ್ದಾಗ ಒಬ್ಬನು ಓಡುತ್ತಾ ಬಂದು ಅವರ ಮುಂದೆ ಮೊಣಕಾಲೂರಿ,

"ಒಳ್ಳೆಯ ಬೋಧಕರೇ, ನಾನು ನಿತ್ಯಜೀವಕ್ಕೆ ಬಾಧ್ಯಸ್ಥನಾಗಬೇಕಾದರೆ ಏನು ಮಾಡಬೇಕು?"

ಎಂದು ಅವರನ್ನು ಕೇಳಿದನು. ¹⁸ಯೇಸುವು ಅವನಿಗೆ,

"ನೀನೇಕೆ ನನ್ನನ್ನು ಒಳ್ಳೆಯವನೆಂದು ಕರೆಯುವೆ? ದೇವರೊಬ್ಬನ ಹೊರತು ಮತ್ತಾರೂ ಒಳ್ಳೆಯವನಲ್ಲ. ¹⁹ನಿನಗೆ ವ್ಯಭಿಚಾರ ಮಾಡಬಾರದು, ಕೊಲ್ಲಬಾರದು, ಕದಿಯಬಾರದು, ಸುಳ್ಳುಸಾಕ್ಷಿ ಹೇಳಬಾರದು, ಮೋಸ ಮಾಡಬಾರದು, ನಿನ್ನ ತಂದೆಯನ್ನೂ ತಾಯಿಯನ್ನೂ ಗೌರವಿಸಬೇಕು ಎಂಬ ಈ ಆಜ್ಞೆಗಳು ಗೊತ್ತಿವೆಯಲ್ಲಾ,"

ಎಂದರು. ²⁰ಆಗ ಅವನು ಪ್ರತ್ಯುತ್ತರವಾಗಿ ಯೇಸುವಿಗೆ,

"ಗುರುವೇ, ನಾನು ಇವೆಲ್ಲವುಗಳನ್ನು ನನ್ನ ಬಾಲ್ಯದಿಂದಲೇ ಅನುಸರಿಸುತ್ತಾ ಬಂದಿದ್ದೇನೆ,"

ಎಂದನು. ²¹ಆಗ ಯೇಸುವು ಅವನನ್ನು ದೃಷ್ಟಿಸಿ ನೋಡಿ ಅವನಿಗೆ ಪ್ರೀತಿಯಿಂದ,

"ನಿನ್ನಲ್ಲೊಂದು ಕೊರತೆ ಇದೆ; ನೀನೀಗಲೇ ಹೊರಟು ಹೋಗಿ ನಿನ್ನದಾಗಿರುವುದನ್ನೆಲ್ಲಾ ಮಾರಿ ಬಡವರಿಗೆ ಹಂಚು; ಆಗ ಪರಲೋಕದಲ್ಲಿ ನಿನ್ನ ಸಂಪತ್ತು ಹೆಚ್ಚಾಗುವುದು; ಅನಂತರ ನೀನು ಬಂದು ನಿನ್ನ ಶಿಲುಬೆಯನ್ನು ಹೊತ್ತುಕೊಂಡು ನನ್ನನ್ನು ಹಿಂಬಾಲಿಸು,"

ಎಂದರು. ²²ಅಪಾರ ಸಂಪತ್ತಿಗೆ ಒಡೆಯನಾದ ಆತನು ಯೇಸುವಿನ ಮಾತನ್ನು ಕೇಳುತ್ತಲೇ ವ್ಯಸನಗೊಂಡು ಅಲ್ಲಿಂದ ಹೊರಟು ಹೋದನು; ²³ಆಗ ಯೇಸು ಸುತ್ತಲೂ ಇರುವ ತಮ್ಮ ಶಿಷ್ಯರನ್ನು ನೋಡಿ,

"ಐಶ್ವರ್ಯವುಳ್ಳವರು ದೇವರ ರಾಜ್ಯವನ್ನು ಸೇರುವುದು ತುಂಬಾ ಕಷ್ಟ,"

ಎಂದರು. ²⁴ಶಿಷ್ಯರು ಅವರ ಮಾತುಗಳಿಗೆ ಬೆರಗಾದರು; ಆದರೆ ಯೇಸು ಅವರಿಗೆ,

"ಮಕ್ಕಳಿರಾ, ದೇವರ ರಾಜ್ಯದಲ್ಲಿ ಪ್ರವೇಶಿಸುವುದು ಎಷ್ಟೋ ಕಷ್ಟ. ²⁵ಐಶ್ವರ್ಯವಂತನು ದೇವರ ರಾಜ್ಯದೊಳಕ್ಕೆ ಪ್ರವೇಶಿಸುವುದಕ್ಕಿಂತ ಒಂಟೆಯು ಸೂಜಿಯ ಕಣ್ಣಿನಲ್ಲಿ ನುಗ್ಗುವದು ಸುಲಭ,"

ಎಂದರು. ²⁶ಈ ಮಾತಿಗೆ ಅವರು ಅತ್ಯಾಶ್ಚರ್ಯಪಟ್ಟು,

"ಹಾಗಾದರೆ ಈ ಜಗತ್ತಿನಲ್ಲಿ ಯಾರಿಗೆ ತಾನೇ ರಕ್ಷಣೆ ದೊರೆತೀತು?"

ಎಂದು ತಮ್ಮತಮ್ಮೊಳಗೆ ಅಂದುಕೊಂಡರು. ²⁷ಆಗ ಯೇಸುವು ಅವರನ್ನು ದೃಷ್ಟಿಸುತ್ತಾ,

"ಮನುಷ್ಯರಿಗೆ ಇದು ಅಸಾಧ್ಯವಾಗಿದೆ; ಆದರೆ ದೇವರಿಗಲ್ಲ; ಏಕೆಂದರೆ ದೇವರಿಗೆ ಎಲ್ಲವೂ ಸಾಧ್ಯವಾಗಿವೆ,"

ಎಂದರು. ²⁸ತರುವಾಯ ಪೇತ್ರನು ಯೇಸುವಿಗೆ,

"ಇದೋ, ನಾವು ಎಲ್ಲವನ್ನೂ ಬಿಟ್ಟು ನಿಮ್ಮನ್ನು ಹಿಂಬಾಲಿಸಿದ್ದೇವೆ,"

ಎಂದು ಹೇಳಿದರು. ²⁹ಅದಕ್ಕೆ ಪ್ರತ್ಯುತ್ತರವಾಗಿ ಯೇಸು ,

"ನಾನು ನಿಮಗೆ ನಿಜವಾಗಿ ಹೇಳುತ್ತೇನೆ; ಯಾರು ನನ್ನ ನಿಮಿತ್ತ ಹಾಗು ಸುವಾರ್ತೆಯ ನಿಮಿತ್ತವಾಗಿ ಮನೆಯನ್ನಾಗಲಿ, ಸಹೋದರರನ್ನಾಗಲಿ, ಸಹೋದರಿಯರನ್ನಾಗಲಿ, ತಂದೆ-ತಾಯಿಯನ್ನಾಗಲಿ, ಹೆಂಡತಿಯನ್ನಾಗಲಿ, ಮಕ್ಕಳನ್ನಾಗಲಿ ಭೂಮಿಯನ್ನಾಗಲಿ ಬಿಟ್ಟಿರುವನೋ ³⁰ಅವನು ನೂರರಷ್ಟು ಮನೆಗಳನ್ನೂ, ಸಹೋದರರನ್ನೂ, ಸಹೋದರಿಯರನ್ನೂ, ತಾಯಂದಿರನ್ನೂ, ಮಕ್ಕಳನ್ನೂ, ಭೂಮಿಯನ್ನೂ ಹೊಂದುವನಲ್ಲದೆ ಮುಂದಿನ ಲೋಕದಲ್ಲಿ ನಿತ್ಯ ಜೀವವನ್ನೂ ಹೊಂದುವನು. ³¹ಆದರೆ ಮೊದಲಿನವರಾದ ಅನೇಕರು ಕಡೆಯವರಾಗುವರು; ಕಡೆಯವರಾದವರು ಮೊದಲಿನವರಾಗುವರು,"

ಎಂದು ಹೇಳಿದರು.

ಮರಣ ಪುನರುತ್ಥಾನಗಳನ್ನು ಯೇಸು ಮೂರನೆಯ ಸಲ ಮುಂತಿಳಿಸಿದ್ದು

(ಮತ್ತಾಯ 20:17-19; ಲೂಕ 18:31-34)

³²ಅವರು ಜೆರುಸಲೇಮಿನ ಹಾದಿಯನ್ನು ಹಿಡಿದು ಸಾಗುತ್ತಿದ್ದಾಗ ಯೇಸು ಎಲ್ಲರಿಗಿಂತ ಮುಂದಾಗಿ ನಡೆಯುತ್ತಿದ್ದುದನ್ನು ಕಂಡು ಶಿಷ್ಯರು ಆಶ್ಚರ್ಯಪಟ್ಟರು; ಆದರೆ ಯೇಸುವನ್ನು ಹಿಂಬಾಲಿಸುತ್ತಿದ್ದವರು ಭಯಪಟ್ಟರು. ಆಗ ಯೇಸುವು ಹನ್ನೆರಡು ಮಂದಿ ಶಿಷ್ಯರನ್ನು ಕರೆದು ತಮಗೆ ಸಂಭವಿಸಲಿರುವವುಗಳು ಯಾವುವೆಂದು ಅವರಿಗೆ ತಿಳಿಸಿದರು.

³³"ನೋಡಿರಿ, ನಾವು ಜೆರುಸಲೇಮಿಗೆ ಹೋಗುತ್ತಿದ್ದೇವೆ; ಅಲ್ಲಿ ನರಪುತ್ರನನ್ನು ಪ್ರಧಾನಯಾಜಕರಿಗೂ, ಧರ್ಮಶಾಸ್ತ್ರಿಗಳಿಗೂ ಹಿಡಿದುಕೊಡುವರು; ಅವರು ಆತನಿಗೆ ಮರಣದಂಡನೆಯನ್ನು ವಿಧಿಸಿ ಅನ್ಯಜನಗಳ ಕೈಗೆ ಒಪ್ಪಿಸುವರು. ³⁴ಅವರು ಆತನನ್ನು ಅಪಹಾಸ್ಯಗೈದು, ಕೊರಡೆಗಳಿಂದ ಹೊಡೆದು, ಆತನ ಮೇಲೆ ಉಗುಳಿ, ಆತನನ್ನು ಕೊಲ್ಲುವರು; ಮೂರನೇ ದಿನದಲ್ಲಿ ಆತನು ಜೀವಿತನಾಗಿ ಎದ್ದು ಬರುವನು,"

ಎಂದರು.

ದೀನಭಾವದ ಕುರಿತು ಶಿಷ್ಯರಿಗೆ ಬೋಧನೆ

(ಮತ್ತಾಯ 20:20-28)

³⁵ಆಗ ಜೆಬೆದಾಯನ ಮಕ್ಕಳಾದ ಯಕೋಬ, ಯೊವಾನ್ನರು ಯೇಸುವಿನ ಬಳಿಗೆ ಬಂದು,

"ಗುರುವೇ, ನಾವು ಇಚ್ಚಿಸಿದುದನ್ನು ನೀವು ನಮಗಾಗಿ ಮಾಡಿಕೊಡಬೇಕೆಂದು ನಾವು ನಿಮ್ಮಲ್ಲಿ ಕೇಳಿಕೊಳ್ಳುತ್ತೇವೆ,"

ಎಂದರು. ³⁶ಅದಕ್ಕೆ ಯೇಸುವು ಅವರಿಗೆ,

"ನಾನು ನಿಮಗೆ ಏನು ಮಾಡಬೇಕೆಂದು ಇಚ್ಚಿಸುತ್ತೀರಿ?"

ಎಂದು ಕೇಳಲು, ³⁷ಅವರು,

"ನೀನು ಮಹಾಮಹಿಮೆಯಲ್ಲಿ ಬರುವಾಗ ನಮ್ಮಿಬ್ಬರಲ್ಲಿ ಒಬ್ಬನು ನಿಮ್ಮ ಬಲಗಡೆಯಲ್ಲಿಯೂ ಇನ್ನೊಬ್ಬನು ನಿಮ್ಮ ಎಡಗಡೆಯಲ್ಲಿಯೂ ಕುಳಿತುಕೊಳ್ಳುವಂತೆ ನಮಗೆ ಅನುಗ್ರಹಿಸು,"

ಎಂದರು. ³⁸ಅದಕ್ಕೆ ಯೇಸುವು ಅವರಿಗೆ,

"ನೀವು ಏನನ್ನು ಬೇಡಿಕೊಳ್ಳುತ್ತೀರೋ ನಿಮಗೆ ತಿಳಿಯದು; ನಾನು ಕುಡಿಯುವ ಪಾತ್ರೆಯಲ್ಲಿ ನೀವು ಕುಡಿಯುವಿರಾ? ಮತ್ತು ನಾನು ಹೊಂದುವ ದೀಕ್ಷಾಸ್ನಾನವನ್ನು ನೀವು ಹೊಂದುವಿರಾ?"

ಎಂದು ಕೇಳಲು, ³⁹ಅವರು,

"ನಮ್ಮಿಂದಾಗುವುದು,"

ಎಂದರು. ಆದರೆ ಯೇಸು ಅವರಿಗೆ,

"ನಾನು ಕುಡಿಯುವ ಪಾತ್ರೆಯಲ್ಲಿ ನೀವು ನಿಜವಾಗಿಯೂ ಕುಡಿಯುವಿರಿ; ನಾನು ಹೊಂದುವ ದೀಕ್ಷಾಸ್ನಾನವನ್ನು ನೀವೂ ಹೊಂದುವಿರಿ. ⁴⁰ಆದರೆ ನನ್ನ ಬಲಗಡೆಯಲ್ಲಿ ಮತ್ತು ನನ್ನ ಎಡಗಡೆಯಲ್ಲಿ ಕುಳಿತುಕೊಳ್ಳುವಂತೆ ಅನುಗ್ರಹ ಮಾಡುಬೇಕಾದುದು ನಾನಲ್ಲ; ಅದು ಯಾರಿಗಾಗಿ ಸಿದ್ಧಮಾಡಲ್ಪಟ್ಟಿದೆಯೋ ಅವರಿಗೆ ಕೊಡಲಾಗುವುದು,"

ಎಂದರು. ⁴¹ಉಳಿದ ಹತ್ತು ಮಂದಿ ಶಿಷ್ಯರು ಅದನ್ನು ಕೇಳಿ, ಯಕೋಬ ಮತ್ತು ಯೊವಾನ್ನರ ಮೇಲೆ ಬಹಳವಾಗಿ ಕೋಪಗೊಂಡರು. ⁴²ಆದರೆ ಯೇಸು ಅವರನ್ನು ತಮ್ಮ ಹತ್ತಿರಕ್ಕೆ ಕರೆದು,

"ಅನ್ಯಜನಗಳನ್ನು ಆಳುವುದಕ್ಕೆ ನೇಮಿಸಲ್ಪಟ್ಟವರು ಅವರ ಮೇಲೆ ದೊರೆತನ ಮಾಡುತ್ತಾರೆ; ಅವರಲ್ಲಿ ದೊಡ್ಡವರು ಸಣ್ನವರ ಮೇಲೆ ಅಧಿಕಾರ ಮಾಡುತ್ತಾರೆಂದು ನೀವು ಬಲ್ಲಿರಿ. ⁴³ಆದರೆ ನಿಮ್ಮಲ್ಲಿ ಹಾಗಿರಬಾರದು; ನಿಮ್ಮಲ್ಲಿ ದೊಡ್ಡವನಾಗಿರಲು ಬಯಸುವವನು ನಿಮ್ಮ ಸೇವಕನಾಗಿರಬೇಕು. ⁴⁴ನಿಮ್ಮಲ್ಲಿ ಅತಿಮುಖ್ಯನಾಗಿರಬೇಕೆಂದು ಬಯಸುವವನು ಎಲ್ಲರಿಗೂ ಸೇವಕನಾಗಿರಬೇಕು. ⁴⁵ಏಕೆಂದರೆ ನರಪುತ್ರನು ಸೇವೆ ಮಾಡಿಸಿಕೊಳ್ಳುವುದಕ್ಕಾಗಿ ಬಂದವನಲ್ಲ, ಆದರೆ ಸೇವೆ ಮಾಡುವುದಕ್ಕೂ ತನ್ನ ಪ್ರಾಣವನ್ನು ಅನೇಕರಿಗಾಗಿ ಅರ್ಪಿಸುವುದಕ್ಕೂ ಬಂದವನು,"

ಎಂದು ಹೇಳಿದರು.

ದೃಷ್ಟಿ ದೊರೆತ ಬಾರ್ತಿಮಾಯನೆಂಬ ಒಬ್ಬ ಕುರುಡ

(ಮತ್ತಾಯ 20:29-34; ಲೂಕ 18:35-43)

⁴⁶ತರುವಾಯ ಅವರು ಜೆರಿಕೋವಿಗೆ ಬಂದರು; ಯೇಸುವು ತಮ್ಮ ಶಿಷ್ಯರೂ ಹಾಗು ಬಹುಸಂಖ್ಯೆಯ ಜನರೊಂದಿಗೆ ಜೆರಿಕೋವಿನಿಂದ ಹೊರಟಾಗ ತಿಮಾಯನ ಮಗನಾದ ಬಾರ್ತಿಮಾಯನೆಂಬ ಕುರುಡನು ಹಾದಿಯ ಬದಿಯಲ್ಲಿ ಕುಳಿತುಕೊಂಡಿದ್ದನು. ⁴⁷ಅವನು ಕುರುಡ ಭಿಕ್ಷಕನು. ನಜರೇತಿನ ಯೇಸು ಆ ಹಾದಿಯಲ್ಲಿ ಹೋಗುತ್ತಿರುವುದನ್ನು ಕೇಳಿದ ಅವನು,

"ದಾವೀದನ ಪುತ್ರ ಯೇಸುವೇ, ನನ್ನನ್ನು ಕರುಣಿಸು..."